Mətbuat-monitorinq 20.10.15

Rəsmi qəzetlər dövlət başçısı İlham Əliyevin Gürcüstanın xarici işlər nazirini qəbul etməsi xəbərini, sahibkarlıq fəaliyyəti haqqında fərmanının mətnini və Fransanın “Opinionvay” araşdırma şikətinin Azərbaycan əhalisinin 78%-nin İlham Əliyevin fəaliyyətindən razı qalması haqda sorğusunun nəticələrini ilk səhifələrdə yerləşdiriblər.

 “Azadlıq” qəzeti MTN-in keçmiş rəhbəri Eldar Mahmudova yaxın generallar barədə həbs qətimkan tədbiri seçildiyini yazaraq, ümumilikdə MTN-in 10 zabiti barədə həbs qərarı verildiyini manjetə çıxarıb.

Qəzet “Azersun holdinq”in “Paşa holdinq”ə biləşdirilməkdə olduğunu yazaraq, bunu “Paşa holdinq”in ölkədə yeyinti sənayesini tam nəzarətə götürməsi sayır.

Həbsdə olan REAL Hərəkatının sədri İlqar Məmmədov vəkili Cavad Cavadova oktyabrın 16-da 2 saylı həbsxana rəhbərliyi tərəfindən döyüldüyünü bildirib.

Milli Şura həbsdə olan REAL Hərəkatının sədri İlqar Məmmədovun döyülməsini pisləyən bəyanat yayaraq bunu hakimiyyətin özbaşınalığı adalandırır.

“MTN məsələsi”ndə 10 nəfər zabitin həbsə alınmasına ekspertlər “bu qədər kadr “brak” çıxırsa, deməli, hökumət yerində deyil” şərhi veriblər.

Rusiyanın Azərbaycana İŞİD təhlükəsi olması bəyanatlarını ekspertlər “Azərbaycanı öz çətiri altına almaq üçün “İŞİD manipulyasiyası” kimi şərh edirlər.  

Dövlət qurumlarında əmək haqlarının verilməsində problemlər yarandığını yazan qəzet bunu “ölkədə maaş böhranı başlaması” kimi təsnif edir.

Ekspertlər ölkədə vergi bazasının genişləndirilməsini “gəlirlər azaldığı üçün hökumətin ən ağlagəlməz mənbələrə belə mürciət etməsi” kimi dəyərləndirirlər.

“Ekspress” qəzeti dövlət başçısı İlham Əliyevin sahibkarlıq fəaliyyətilə bağlı imzaladığı fərmana “sahibkar olmaq xeyli asanlaşacaq” mövqeyini önə çəkib.

Ekspertlər hökumət tənzimlənməsindən sonra bəzi dərmanların qiymətləri firmalara sərf etmədiyi üçün apteklərdə dərman qıtlığı yaşanmasına diqqət çəkirlər.

“Exo” qəzeti kredit borcu olan 4 min nəfərin ölkədən çıxışına yasaq qoyulmasına toxunaraq, 2 milyon 490 min vətəndaşın banklara kredit borcu olduğunu xatırladır və “10 manat borc da xaricə getməyə mane ola bilər” ironiyasını önə çəkir.

Rusiya prezidenti Putinin MDB dövlətləri arasında hesablaşmaların milli valyutalarda aparılması təklifini ekspertlər məqsədəuyğun saymayıblar.

“Novoe Vremya” qəzeti MTN şefi Eldar Mahmudovun işdən azad edilməsinə rəsmi Bakının konkret səbəb göstərməməsinə “Eldar Mahmudovu nəyə görə cəzalandırdılar?” mövqeyini diqqət mərkəzinə çəkib.

Qəzet dövlət başçısı İlham Əliyevin ölkədə sahibkarlıq fəaliyyətilə bağlı fərman imzalamasını, yoxlamaları 2 il müddətinə dayandırmasını “biznesin nəfəs ala bilməsi” kimi dəyərləndirir.

“Bizim yol” qəzeti dövlət başçısının sahibkarlıq subyektlərində yoxlamaları 2 il müddətinə dayandırmasını ilk səhifəyə yerləşdirib.

“Evrobank” lisenziyasını qanunsuz ləğv etdiyinə görə Mərkəzi Bankı məhkəməyə verib.

“Yeni Müsavat ” qəzeti MTN-in keçmiş şefi Eldar Mahmudovla bağlı “məxfi məlumatları” oğurlaması kimi iddiların ortaya çıxmasını ilk səhifəyə çıxarıb.

Qəzetə görə, nəqliyyat naziri Ziya Məmmədov, yaxınları, biznesi barədə son vaxtlar yazılanları nazirlik rəsmiləri “nazir ətrafında süni ajiotaj” adlandırıblar.

Qəzetə görə, MTN şefi Eldar Mahmudovun arxasınca nazir Ziya Məmmədov və “Azərenerji” rəhbəri Etibar Pirverdiyevin cəzalandırılması gözlənilir.

Bu ilin avqustunda döyülərək qətlə yetirilən jurnalist Rasim Əliyevin ailəsi istintaqın gedişindən narazılığını ifadə edib.