Mətbuat-Monitorinq 21.12.13

Rəsmi qəzetlər dövlət başçısı İlham Əliyevin ölkənin şimal bölgəsinə səfəri barədə xəbərləri ilk səhifələrə çıxarıblar.

“Azadlıq” qəzeti azərbaycanlı iş adamı Hafiz Məmmədovun “Lans” klubuna yatırımları ilə bağlı Fransa kəşfiyyatının bu pulların mənşəyini axtramasını manjetə çıxarıb.

Adı məxfi neft sazişləri imzalaması ilə ictimai gündəmə gələn Anar Əliyevin fəaliyyətinin şəffaf olması haqda açıqlamasına ekspertlər “o zaman onun adı niyə rəsmi milyonçulıar sırasında, vergi ödəmələri barədə sənədlərdə yoxdur?” şərhi veriblər.

MTN təcridxanasında saxlanılan jurnalist Pəriv Həşimlinin soyundurularaq “karsa” salındığını yazan qəzet bunu “qəddarlıq” adlandırır.

Müsavat Partiyası başqanının müşaviri Yeganə Hacıyeva “cəmiyyətin maraqlarını partiya maraqlarından üstün tutmasına görə” partiyadan istefa etdiyini bildirib.

Rabitə Nazirliyinin “Azercell” və “Bakcell”də tariflərin ucuzlaşacağı haqda bəyanatını mobil operatorları təkzib ediblər.

RF Dövlət Dumasının deputatı Dmitri Qorovtsov Mahaçqala gömrük postunda “haqq yığan” Azərbaycan firmasından FTX-yə şikayət yazıb. 

“Ekspress” qəzeti dövlət başçısının Naxçıvanda 5-ci korpusun bazası əsasında Əlahiddə Ümumqoşun Ordusu yaradılması haqda fərman imzaladığını bildirir. 

Ekspertlər ölkənin orta məktəblərində qadın müəllimlərin bütün müəllim kontingentinin 85%-ni təkil etrməsi haqda açıqlama yayıblar.

“Novoe Vremya” qəzeti QHT rəhbəri Anar Məmmədlinin həbsinə ölkənin vətəndaş cəmiyyəti institutlarından və beynəlxalq təşkilatlardan olan kütləvi etirazları “vətəndaş cəmiyyətinin həyəcan təbili çalması” adlandırır.

“Bizim yol” qəzeti Fransa kəşfiyyatının azərbaycanlı iş adamı Hafiz Məmmədovu araşdırmasını önə çəkib.

“Yeni Müsavat” qəzeti Türkiyədəki həbslərin Azərbaycanı silkələməsi, həbsə alınan iş adamı Rza Zərrabın Bakıda əsas adamının Cavanşir Paşazadə olması xəbərini ilk səhifəyə çıxarıb. Naxçıvanın başçısı Vasif Talıbov, iş adamı Mübariz Mənsimovla, “Royalbank”la da əlaqələr üzə çıxır.

Qəzet Gömrük Komitəsinin sədri Aydın Əliyevi, nazir Fazil Məmmədovu “xalqı hökumətdən narazı salan nazirlər” kimi təqdim edir. 

QHT rəhbəri Anar Məmmədlinin “vergidən yayınma” adı ilə həbsinə ekspertlər “A.Məmmədli ödəməli olmadığı vergini ödəməməkdə suçlanır” rəyi veriblər.

Müxalif siyasi qüvvələrin təmsilçiləri xalqın etiraz aksiyalarına kütləvi şəkildə qoşulmamasını iqtidarın qəddarlığı, müxalifətin zəifliyi, xalqın inamsızlığı, teleblokadaların olması arqumentlərilə izah ediblər.

“Ana Vətən” partiyasının sədri Fəzail Ağamalı Rusiyadan 26 min azərbaycanlının artıq deportasiya olunduğu barədə açıqlama verib.