Mətbuat-Monitorinq 22.04.15

Rəsmi qəzetlər dövlət başçısı İlham Əliyevin I Moskva Dövlət Tibb Universitetinin rektorunu qəbul etməsi haqda xəbəri ilk səhifələrə yerləşdiriblər.

Bundan əlavə, ali məktəblərdə yeni maliyyələşmə mexanizminin tətbiqi haqda, ovçuluqla  bağlı Nazirlər Kabinetinin  qərarına dəyişikliklərin mətni bu qəzetlərdə yer alır.

“Azərbaycan” qəzeti insan haqlarının ağır durumuna, korrupsiyaya görə rəsmi Bakını tənqid edən ABŞ-ı və Avropa dövlətlərinə “Korrupsiya çamuruna bulaşanlar” məqaləsi dərc edib.

“Azadlıq”  iqtidar daxilində bir qrupun yeni devalvasiyanın zəruri olması, digər qrupun bunun əleyhinə çıxması iddiasını önə çəkərək bu iddianı “hakimiyyət daxilində “devalvasiya müzakirələri” kimi dəyərləndirir.

Qəzet ekspertlərə isnadən rəsmi Bakının Qərbə “savaş” açmasının kökündə şantaj siyasətilə beynəlxalq təzyiqləri dayandırmaq cəhdi durur.

Tanınmış jurnalist Xədicə İsmayılın apellyasiya məhkəməsində jurnalistin şüşə qəfəsdən çıxarılaraq vəkillərinin yanında oturması vəsatətinə hakim “buna konvoy icazə verməlidir” biabırçı bəyanatını səsləndirib.

İnsan haqlarının ağır durumuna görə beynəlxalq tənqidlərə məruz qalan rəsmi Bakının bunlara “sən ermənipərəstsən” mövqeyini qəzet “iqtidarın tənqidçilərə “çığal uşaq münasibəti” kimi dəyərləndirir.

“Ekspress”  Bakıda mənzilə basqın olması, Qarabağ cəbhəsində erməni ordusunun 5 hərbçisinin öldürülməsi, 10-nun isə yaralanması haqda xəbərləri diqqət mərkəzinə çəkiblər.

“Exo”  ölkədə rəsmi olaraq 29 mindən çox şəxsin işsiz kimi qeydə alınmasını, ekspertlərə isnadən gerçək işsiz sayının rəsmi statistikadan ən azı bir neçə dəfə çox olduğunu önə çəkir.    

“Bizim yol”  Qarabağ cəbhəsində erməni tərəfin 5 əsgərnin öldürülməsi, 10-nun yaralanması xəbərini ön plana çıxarıb.

Qəzet ekspertlərin təhlillərinə isnadən Bakıda mənzillərin qiymətinin qalxdığını bildirir.

“Yeni Müsavat”   “qaz nəqli məsələsi”ndə Avropa İttifaqını rəsmi Bakını Kremllə üz-üzə qoymaq cəhdində ittiham etməsini ilk səhifəyə çıxarıb.

Qəzetin yazdığına görə, Biləsuvar buraxılış-keçid məntəqəsində Azərbaycan tərəfdən eyni şəxsin İrana əvvəlki kimi həftədə bir dəfə yox, ayda yalnız iki dəfə buraxılması qaydası işə düşüb, amma bunun səbəbləri vətəndaşlara açıqlanmır.