Mətbuat-Monitorinq 23.10.13

Rəsmi və iqtidaryönlü qəzetlər dövlət başçısı İlham Əliyevin “Dədə Qorqud” parkında görülən işlərlə tanış olması haqda yazırlar. Bu qəzetlər yenidən dövlət başçısı postunda qalan İlham Əliyevin Nazirlər Kabinetinin tərkibi haqqında  sərəncamının mətnini dərc ediblər.   

“Azadlıq” qəzeti köhnə hökumətdən əmək və müdafiə nazirləri xaric, yeni Nazirlər Kabinetinin formalaşdırılmasını “İlham Əliyevin yeni-köhnə kabineti” kimi dəyərləndirir.   

Ölkədəki bütün böyük-kiçik şirkət rəhbərlərinə İlham Əliyevi təbrik etmək göstərişi verilib, ekspertlər  bu duruma “xaricdə belə təbriklər suallara səbəb olardı” şərhini veriblər. 

Sumqayıtda fəaliyyət göstərən və bu günlərdə tamamilə yanan “Karvan” Ticarət Mərkəzinin icarədarları kompensasiya tələbilə aksiyalar keçirirlər. 

“Zerkalo” Kremlin “özgə”lərə (oxu- miqrantlara) müharibə elan etməsi”ni ironiya ilə oxucuya çatdıraraq bu məsələdə “Orxan Zeynalov əhvalatı”nın sadəcə vaxtında “tələsdiyini” xatırladır.  

“Ekspress”  qanunsuz qeysəriyyə kəsiyi aparan həkimlərin cinayət məsuliyyətinə cəlb olunacaqlarını ilk səhifəyə çıxarıb. 

Qəzet Ələt qəsəbəsi ilə bağlı layihələrə əsasən qəsəbənin Qaradağ rayonundan ayrılaraq əlahiddə inzibati vahid kimi formalaşacağını nəzərə çatdırır.  

“Exo”  ekspertlərə istinadən Rusiyada miqrantların sıxışdırılmasına baxmayaraq onların kütləvi şəkildə vətənlərinə qayıdacaqlarının əsaslı olmadığını bəyan edir. 

“Novoe Vremya”  İsrail və Böyük Britaniyanın Azərbaycanda xüsusi əməliyyatlar həyata keçirdiklərini yazaraq bunu “balanssız kəndirbazlıq” adlandırır. 

“Bizim yol”  müdafiə və əmək nazirlərinin, “Xəzərdənizgəmiçilik” qurumu rəhbərinin yenidən öz postlarına təyin olunmamasını onların “vurulması” kimi dəyərləndirir.

Qəzet Sumqayıtdakı “Karvan” Ticarət Mərkəzindəki yanğınla bağlı hökumətin icarədarlara kompensasiya ödəməyəcəyini, amma “köməklik” olunacağı vədini verdiyini nəzərə çatdırır. 

Azərbaycanda vətəndaşların maaşlarının hələ də SSRİ-dən qalma üsullarla hesablandlığını yazan qəzet buna “sovet maaşı ilə keçinən ölkə” mövqeyini ifadə edir.   

“Yeni Müsavat”  Füzuli Ələkbərov və Səfər Əbiyevin yenidən nazir təyin olunmamasını “onların komandadan qovulması” adlandırır. 

Qəzet bildirir ki, mülkünü bu yaxınlarda AXCP-yə icarəyə vermiş şəxsə mülkünü partiyadan geri alması ilə bağlı təzyiqlər edilir. 

Media ekspertləri “Azadlıq” qəzetinə təzyiqləri “rəsmi Bakının mətbuatın ağzını yummaq istəyi” adlandırırlar. 

2014-cü ilin Azərbaycanda bahalaşma ili olacağını yazan qəzet ekspertlərə istinadən qarşıdakı ilin sahibkar və istehlakçılar üçün ağır il olacağı barədə xəbərdarlıq edirlər.