Mətbuat-Monitorinq 23.11.12

Rəsmi qəzetlər dövlət başçısı İlham Əliyevin hələ də davam edən Sinqapur səfəri, görüşləri haqda yazırlar.  

“Azadlıq” qəzeti PA rəhbəri Ramiz Mehdiyevin və nazir Kəmaləddin Heydərovun şəkilləri fonunda post-Əliyev dövrü uğrunda qruplararası ziddiyyətlərin kəskinləşdiyini iddia edir. 

Azərbaycanın Rusiya ilə münasibətlərinin korlanmasının arxasında milli maraqlar yox, rəsmi Kremlin rəsmi Bakının maraqlarına toxunması durur. 

Suriya diktatoru Bəşər Əsəd ona qarşı mübarizədə silahlı müxalifətin sıralarında azərbaycanlıların olduğunu deyərək Azərbaycanı ittihama məruz qoyub. 

Qəzet vaxtilə Bakı milyonçusu Murtuza Muzxtarovun evi, sovet dönəmində “Səadət Sarayı” olan binanın PA-ya verilməsini Nazirlər Kabinetinin “müəmmalı qərarı”  adlandırır. 

“Zerkalo” bu günlərdə növbəti dəfə regiona gələcək ATƏT-in Minsk Qrupunun səfəri fonunda qurumun 20 il ərzində Qarabağ münaqişəsinin həllində irəliləyişə nail ola bilməməsini “Qarabağ cəbhəsində dəyişiklik yox” şəklində ifadə edir.

“Ekspress”. Boru kəmərlərinin müdafiəsi ilə bağlı rəsmi Bakının NATO-dan yardım istəməsinə Alyans müsbət cavab verib.  

Eks-prezident Əbülfəz Elçibəyin zəhərlədilməsilə bağlı cinayət işinin dayandırılması haqda xəbərləri müstəntiq Vaqif Süleymanov təkzib edərək “istintaqa mətbuatın bildiyindən çox-çox artıq şeylərin məlum olması” haqda açıqlama verib. 

“Novoe Vremya” rəsmi Bakının iqtidarın maraqlarını qoruması üçün NATO-ya yaxınlaşmasını ironik şəkildə “Şərqin qədim qapısının NATO önündə daha geniş açılması” kimi dəyərləndirir. 

“Bizim yol” yazır ki, məhkəmə qərarının olmasına baxmayaraq,  “balıq Hafiz”in əmisioğlu, Samux rayon icra başçısı Vilyam Hacıyev iş adamı Nəsrullah Nəzərovdan aldığı 310 min manat pulu qaytarmaq istəmir. 

Rusiyadan Bakıya gələn iş adamı Müşfiq Xəlilov noyarbın 22-i gecə 7 naməlum şəxs tərəfindən güllə atəşinə məruz qalsa da güllələrdən yayına bilib. 

“Yeni Müsavat” noyabrın 25-də, yəni Aşura günü paytaxtda təxribat olacağı haqda əməliyyat məlumatlarının daxil olduğunu yazaraq bu iddianı “Azərbaycanı istəməyən qüvvələrin hərəkətə keçməsi” adlandırır. 

Gənc müsavatçı fəal Nigar Yaqublunun həbsinə etiraz olaraq gənclər təşkilatları kütləvi aksiyalara hazırlaşırlar. 

Türk Dünyası Araşdırmaları Birılyinin rəhbəri Turan Yazqanın vəfatına toxunan qəzet bunu “türk dünyasının böyük bir fikir adamını itirməsi” kimi dəyərləndirir.   

Ölkədəki ictimai-siyasi durumu təhlili edən müxalif siyasilər qəzetə “iqtidarın apardığı siyasətin məntiqi sonluğunun inqilab olacaq” barədə şərh veriblər. 

“Bakı Xəbər” Kremlin Moskvada 20-ə qədər bazarı bağlamaq istəməsini “Moskvanın Azərbaycana təzyiqlərini gücləndirməsi” kimi dəyərləndirir. 

Qəzet İrana qarşı sanksiyaların Ermənistana ciddi zərbə vurduğunu yazaraq Ermənistanın xarici borclarının dövlət büdcəsindən iki dəfə çox olduğunu xatırladır.