Mətbuat-Monitorinq 24.07.13

Rəsmi və iqtidaryönlü qəzetlər dövlət başçısı İlham Əliyevin “Çıraq” neft layihəsinin tərkib hissəsi olan “Qərbi çıraq” platformasının üst modullarında aparılan işlərlə tanış olması haqda xəbəri ilk plana çıxarıblar. 

Bundan əlavə, bu qəzetlərdə Xaçmaz rayonunun sosial inkişafı üçün 2 milyon manatın ayrılması haqda sərəncamın mətni dərc edilib.

Bu qəzetlər müxalifət düşərgəsinin birliyi olan Milli Şura barədə yalan və iftira dolu yazılara yer veriblər.  

“Azadlıq” qəzeti Milli Şuranın prezidentliyə vahid namizədi Rüstəm İbrahimbəyovun Bakıya dönüşündən narahat olaraq onun barəsində həbs olunacağı haqda məlumatların yayılmasını ilk səhifəyə çıxarıb.

Penitensiar Xidmətin talassemiya xəstəsi olan “NİDA”çı Zaur Qurbanlının həbsdə saxlanmasını mümkün saymasını ekspertlər “gənc siyasi fəalı həbsxanada öldürmək cəhdi” adlandırırlar. 

ABŞ-ın Azərbaycandakı keçmiş səfiri Kozlariç rəsmi Vaşinqtonu Azərbaycanda baş verənlərə Misirdəki kimi mövqe bildirməyə çağırıb.   

Hüquq müdafiəçisi Leyla Yunus müxalifətin vahid namizədi olduğu halda ehtiyat namizədin olmasını “iqtidarın oyun qaydalarına uyğun hərəkət” adlandırıb. 

İçərişəhərdə ofisi dağılan “Təmiz dünya” İctimai Birliyinin rəhbəri Mehriban Zeynalova çadırda fəaliyyət göstərməyə məcbur olacaqlarını söyləyib.

“Zerkalo”  son vaxtlar gənc siyasi fəalların narkotik maddə ittihamı ilə həbsə alınmaları ilə bağlı daha bir siyasi fəalın həbsinə “daha bir narkoman ələ keçdi” ironiyasını ifadə edir. 

“Exo”  Azərbaycanda bir kiloqram qara kürünün orta qiymətinin 1500 dollar olduğunu, 100 qram kürünün dəyərinin 12 manatdan 80 manat arasında dəyişdiyini nəzərə çatdırır.  

“Novoe Vremya”  prezident seçkilərilə bağlı ATƏT-in Bakıya müşahidəçilər göndərməməsini “qıcıqlanan Bakıya bir daha toxunmaqdan ehtiyat etmək” adlandırır. 

Rəsmi Bakının korrupsiyaya qarşı mübarizədə uğurlar əldə etməsi barədə bəyanatlarını qəzet “korrupsiyaya qarşı mübarizə” haqqında könə mahnılar” adlandırır. 

“Bizim yol” ölkənin Baş Prokurorluğunun yaxın günlərdə Rüstəm İbrahimbəyova cinayət işi qaldıracağını bildirir. 

Müxalifət düşərgəsində seçki ilə bağlı duruma hüquq müdafiəçisi Eldar Zeynalov “Rüstəm İbrahimbəyovun namizədliyi bir nəticə verməyəcək, amma başqa yol da sadəcə yox idi” mövqeyini ifadə edib. 

“Yeni Müsavat”  keçmiş baş prokuror Eldar Həsənov Paşayevlərə yaxın olduğu üçün “Naxçıvan klanı”nın onun Bakıya qayıtmasına imkan verməməsini önə çəkib. 

Diaspora Komitəsi baş nazirin keçmiş müavini Abbas Abbasovla rəsmi Bakı arasındakı soyuqluğa “Abbas Abbasov Söyün Sadıqovla münasibətinə aydınlıq gətriməlidir” mövqeyini ifadə edib.