Mətbuat-monitorinq 25.07.15

Rəsmi qəzetlər dövlət başçısı İlham Əliyevin İsrailin Azərbaycandakı səfirini qəbul etməsi haqda xəbəri, Migəçevir Dövlət Universitetinin, BMT Sivilizasiyalar Alyansının VII Qlobal Forumunun Bakıda keçirilməsi üçün Təşkilat Komitəsinin yaradılması, Çingiz Əliyevin Dövlət Dəniz Akademiyasının rektoru təyin edilməsi  və daha bir neçə sərəncamların mətnlərini ilk səhifələrdə yerləşdiriblər.

Bundan başqa, bu qəzetlərdə “Reklam haqqında” qanunun mətni də yer alıb. 

“Azadlıq” qəzeti xaricdən yayımlanan “Azərbaycan saatı” teleproqramının rəhbəri Qənimət Zahidin qohumlarına qarşı rəsmi Bakının repressiyalarını manjetə çıxarıb.

Saxta ittihamlarla mühakimə edilməyə başlayan jurnalist Xədicə İsmayıl həbsini “İlham  Əliyevin onunla şəxsi qərəzi olması” kimi dəyərləndirib.

Aidiyyatı qurumlar may ayından bu yana içməli su problemini həll etmədikləri üçün aksiya keçirən Qubanın Zərdabi kənd sakinləri Quba-Xaçmaz magistral yolunu bağlayıblar.

Türkiyə ilə İŞİD arasındakı savaş durumuna toxunan ekspertlər Türkiyənin ən yaxın müttəfiqi olduğu və İŞİD-dən dəfələrlə təhdid aldığı üçün teraktların Azərbaycana “sıçraya” biləcəyini istisna etməyiblər.

İsrail-Azərbaycan yaxınlşamasını politoloqlar qəzetə “İsrailin özünə yeni, yaxın müttəfiq axtarışı” kimi şərh ediblər.

Ölkədə intiharların statistikasına toxunan qəzet bu ilin 7 ayında 57 intihar, 10 intihara cəhd qeydə aldındığını nəzərə çatdırır.     

“Ekspress” qəzeti PA rəsmisi Novruz Məmmədovun Qarabağ probleminə münasibətdə Qərbdən “konkret mövqe gözlədiyini”, amma “Qərbin bunu etməməsi və edə bilməməsi” kimi mücərrəd açıqlamasını önə çəkib.

Qəzetə görə, ölkənin təhsil sistemində yoxlama aparan Maliyyə Nazirliyi aşkarlanan ciddi maliyyə pozuntularına dair faktları ölkə prokurorluğuna göndərib.

“Novoe Vremya” qəzeti PA rəsmisi Novruz Məmmədovun Avropa Birliyi  Şurasının prezidenti Tuskun və ABŞ diplomatı Hoqlandın Azərbaycana səfərini “barışdırıcı” səfər kimi dəyərləndirməsini diqqət mərkəzinə çəkib.

Qəzet sarsıdıcı teraktlara məruz qalan Türkiyənin İŞİD-lə savaşa girməsini “Erdoğaının özünü aldatması” kimi dəyərləndirir.

“Bizim yol” qəzeti “Azərenerji”, ARDNŞ, AZAL kimi dövlət qurumlarının özəlləşdirilə bilməsini “hökumətin pul problemini həll etmək üçün dövlət şirkətlərindən imtina etməsi” kimi ilk səhifəyə yerləşdirib.

Qəzetə açıqlama verən ekspertlər Neft Fondunun ehtiyatlarının azalmasını dolların bahalaşması, xərclərin artması, Fondun aktivlərini satması ilə izah edirlər.

“Yeni Müsavat” qəzeti Mərkəzi Banka (MB) 28 milyon manat vəsait vermədiyi halda “Texnika bank”ın iflasa uğrayacağını ilk səhifəyə çıxararaq faktı həm də MB rəhbərinin bankı əlinə keçirməsinə şans kimi dəyərləndirir.

Qəzet Türkiyə-İŞİD savaşına toxunaraq, Türkiyə hədəfə alındığı üçün müttəfiqi kimi Azərbaycanın hədəfə alınacağını yazaraq, bunu “sürünən terrorun” Azərbaycan sərhədlərinə yaxınlaşması hesab edir.

Bu ilin fevralındakı devalvasiyadan sonra kreditlərin ödənməsində vətəndaşlarla banklar arasında ciddi problemlər yarandığını yazan qəzet “bundan çıxış yolu tapılacaqmı?” sualını gündəmə gətirir.

“Balıq Hafiz”in şortik geyən kişilərə qarşı cəmiyyətə cinayət əməlləri törətmək çağırışına görə hüquqşünaslar onun həbsə alınmalı olduğu bəyanatı səsləndiriblər, psixoloqlar isə onu “natamam insan tipi” adlandırıblar.