Mətbuat-Monitorinq 26.08.15

Rəsmi qəzetlər dövlət başçısı İlham Əliyevin Ağcabədi rayonunun Hüsülü--Kürdlər-Şərəfxanlı-Mirzəhaqverdili avtomobil yolunun tikintisi üçün 2,7 milyon manatın ayrılması haqda sərəncamının mətnini ilk səhifələrdə yerləşdiriblər.

Bundan əlavə, bu qzəetlər “Dövlət qeydiyyatına alınmış dərman vasitələrinin tənzimlənməsi barədə” Tarif Şurasının 2015-ci il 30 iyul tarixli 5 saylı qərarına dəyişikliklərin olunması haqda qərarın tam mətnini dərc ediblər.

“Azadlıq” qəzeti Beynəlxalq Banka kredit borcuna görə həbs dalğasının irihəcmli kredit xahişləri edən  məmurlara çatması və onların “vurula” bilmələrini ilk səhifəyə çəkib.

Qəzet Mingəçevirdə AXCP-nin 2 üzvünün saxlanmasını hakimiyyətin “cəbhəçi ovuna çıxması” kimi dəyərləndirir.

AXCP sədri Əli Kərimli Mingəçevir şəhərində partiya üzvlərinə artan təzyiqlərə “rejimin özünü ayaqda saxlaya bilməsi üçün vətəndaşları məhv etməsi” şərhini verib.

Ölkədə bank sisteminin durumunu təhlil edən ekspertlər 20 bankın bağlana biləcəyi proqnozunu səsləndiriblər.

Ekspertlər neftin dünya bazarındakı hazırki qiymətinin 10 il davam edəcəyi bəyanatını səsləndiriblər.

Qəzet iddia edir ki, Ağsu-Şamaxı rayonu arasında yerləşən və SOCAR prezidenti Rövnəq Abdullayevə məxsus “Şamaxı Palace Sharadil” oteli Paşayevlərin nəzarətinə keçib.

PKK terrorçularının Bakı-Tiflis-Ərzurum qaz kəmərinin partlatmasını ekspertlər “Azərbaycana təhdid mesaj” sayırlar.

İsrail dövləti Azərbaycanı İsrail xalqı üçün potensial təhdidin davam etdiyi ölkələrdən sayaraq vətəndaşlarına Azərbaycana getməmək çağırışı edib.

“Ekspress” Ermənistanın Sərsəng su anbarından Azərbaycanı təhdid üçün istifadə etməsinə “düşmən “su savaşı” aparır” şərhini diqqət mərkəzinə çəkib.

“Exo” ekspertlərin yaxın 3-4 ayda manatın devalvasiyaya uğramayacağı haqda proqnozlarını önə verib.

Ölkədə boşanmaların 75%-nin qadınların təşəbbüsü ilə baş verdiyini yazan qəzet boşanmalara əsas səbəb kimi spirtli içki qəbul olunmasını, yayğın həyat tərzi, ailədə zorakılığı göstərirlər.

“Novoe Vremya” Türkiyədəki partlayışlarla bağlı “Türkiyəni kim partladır” mövqeyini ilk plana çıxarıb.

“Bizim yol” ekspertlərin PKK-nın Bakı-Ərzurum qaz kəmərini partlatmasının arxasında regionda qeyri-sabitliyi artırmaq və Azərbaycana təsir etmək səylərinin durması mövqeyini ilk səhifəyə yerləşdirib.

“Yeni Müsavat” Beynəlxalq Banka kredit borcuna görə “İntertabaakko”nun direktoru İsmayıl Hidayətzadənin həbsini ön plana çıxarıb.

Qəzetin iddiasına görə, hakim YAP-ın deputatlığa namizədlərin siyahısını açmağı yubatması partiyadaxili gərginliyə səbəb olub.

Qəzet qeyd edir ki, Mingəçevir polis şöbəsində  Bəhruz Hacıyevin qətlinə etiraz olaraq avqustun 22-də keçirilən aksiyanın video görüntülərinə baxaraq polislər həbsləri hələ də davam etdirirlər.

Ekspertlər iqtidar böhrandan çıxmaq üçün ciddi addımlar atmadığı halda bunun genişmiqyaslı etirazlara səbəb olacağı barədə xəbərdarlıq edirlər.

Ölkədə 20 bankın bağlana biləcəyi barədə xəbərdarlıq edən ekspertlər əhalini əmanətlərini banklara yatırmazdan öncə bank sisteminə diqqət etməyə çağırırlar.