Mətbuat-Monitorinq 27-28.01.13

Rəsmi qəzetlər son vaxtlar fəallığını daha da artıran müxalifətin aparıcı qüvvələrini, ictimai qurumları, İctimai Palata və Ziyalılar Forumunu, əsgər ölümlərinə etiraz edən qüvvələri təhqir hədəfi seçib. Bu qəzetlərdə çıxış edən ayrı-ayrı deputatlar və digər şəxslər hakimiyyəti tənqid və ifşa edənləri  antimilli qüvvələr kimi təqdim etməyə çalışırlar. 

“Azadlıq” qəzeti ölkə gənclərinin İsmayıllı sakinləri və “Binə” Ticarət Mərkəzinin sahibkarlarını müdafiə aksiyası keçirmələrini, onlarla etirazçının həbsə alınmasını manjetə çıxarıb. 

ABŞ-ın keçmiş səfiri Kozlariç İsmayllıda əhalinin etirazlarını “xalqın narazılığının göstəricisi”, “The Nyu-York Times” qəzeti isə “Əliyev üçün xəbərdarlıq” kimi dəyərləndirir. Qəzet İsmayıllı hadisələri zamanı həbs edilən üçqat dünya çempionu Ramil Cavadovun öldürüldüyünü iddia edir. 

İnsan Haqları Klubu AŞPA-da Azərbaycanda siyasi məhbus hesabatının əleyhinə çıxan Qərb ölkələrilə bağlı “Utanc” kampaniyasına başlayacaq. 

Rəsmi Bakını tənqidə məruz qoyan ictimai-siyasi qüvvələrin hakim ailənin nəzarətində olan telekanallarda təhqir edilməsini şərhçilər “iqtidarın əsəblərinin dözməməsi” kimi dəyərləndiriblər. 

“Yeni Müsavat”  yanvarın 27-də Müsavat başqanı İsa Qəmbərin və onlarla vətəndaş cəmiyyəti institutları təmsilçilərinin Lənkərana buraxılmamasını “iqtidarın “cənub” əməliyyatı biabırçılığı” adlandırır.   

Sosial şəbəkədə “Azadlığa gedən yol” adlı qrup ölkədəki ictimai-siyasi duruma etiraz olaraq yanvarın 30-na “Azadlıq” meydanına mitinq çağırışı edib. 

Bakıdan İsmayıllıya ezam olunan xüsusi qrup videolarda əks edilən şəxsləri hələ də həbs edir və bu, “rayonda gərgin vəziyyətin davam etməsinin göstəricisi” sayılır. 

Son zamanlar haqlı tənqidlərə məruz qalan Müdafiə Nazirliyi rəhbərliyinin bu tənqidləri boğmaq təşəbbüslərini qəzet “nazirliyin torpaqları qoruması əvəzinə özünü qoruması” adlandırır. 

Yazıçı Əkrəm Əylisli iqtidarı “hakimiyyətini qorumaq üçün şüursuz kütlə yetişdirməkdə” ittiham edib. 

Kreml Azərbaycan və Gürcüstanı “SSRİ”  adı ilə yaradılan azad ticarət zonasına birləşdirmək məsələsini müzakirəyə çıxarır.