Mətbuat-Monitorinq 27.11.13

Rəsmi və iqtidaryönlü qəzetlər dövlət başçısı İlham Əliyevin Fransanın xarici ticarət nazirini qəbul etməsi haqda yazırlar. Bundan başqa bəzi qanunlara dəyişikliklərin mətnləri bu qəzetlərdə əksini tapıb.

“Azadlıq” qəzeti şərti “milyarderlər ittifaqı”nın üzvləri Vahid Ələkbərov və İsgəndər Xəlilovun danışıqlar  aparmaq Bakıya üçün gəldikləri barədə xəbəri manjetə çıxarıb.

“Azadlıq” qəzeti “Qasid” yayım firmasının ona 60 min manat borcunu  ala bilmək üçün noyabrın 29-da firma önündə aksiyaya hazırlaşır. 

Qəzetin əməkdaşı Ramin Dekoya irəli sürülən 2 min manat həcminə cəriməni ödəmək üçün 10 gün vaxt verilib, jurnalist isə pulu olmadığını bildirir. 

Beynəlxalq hüquq-müdafiə qurumları Ilham Əliyevə “jurnalistlərin dostu” mükafatının verilməsini “aprel zarafatı”na bənzədiblər. 

Bakı metropoliteninin rəisi Tağı Əhmədovun metro stansiyalarında qəzet-kitab satışını özbaşına qadağan etməməsi barədə açıqlamasını qəzet “iqtidarın fakt qarşısında qoyulması” kimi şərh edir.

ABŞ-ın Azərbaycandakı keçmiş səfiri R.Kozlariç iqtidara İran-Qərb əlaqələrinin normallaşmaqda olduğunu xatırladaraq “Azərbaycanı dramatik çətinliklər gözləyir” xəbərdarlığını edib. 

Siyasi ekspertlər rəsmi Bakının demokratiya və insan haqları sahəsində Avropa Birliyi standartlarını qəbul etməyəcəyi barədə açıqlama verərək bunu iqtidarın “Avrointeqrasiya kursundan imtinası” sayır.     

Rusiyadan azərbaycanlıların qovulmasının fakt olduğunu deyən deputat Vahid Əhmədov iqtidarı xüsusi dövlət proqramı hazırlamağa çağırıb. 

“Zerkalo” Rusiyada son vaxtlar miqrantlara qarşı davam edən təzyiqlərə “vaxtilə arilərin onları əhatə edən barbarlara  iyrənc münasibətinə bu gün Rusiyada rast gəlinir” şərhini verib.

“Ekspress” Avropa İttifaqının “Şərq Tərəfdaşlığı” proqramına daxil olan ölkələrin qurumla assosiativ saziş imzalamayacağını “itirilmiş Şərq” adlandırır.

Dövlət başçısı İlham Əliyevin bu günlərdə müxalifətə dialoq təklifini YAP funsioneri Mübariz Qrubanlı “mövzu tükənən kimi kimsə dialoq sözünü ortaya atır” deməklə təkzib edib.

“Novoe Vremya” rəsmi Bakının müxalifətlə dialoq təklifini növbəti dəfə gündəmə gətirməsini ciddi saymayaraq buna “iqtidar dialoqa hazırdırmı?” sualı ünvanlayır.  

“Bizim yol” yazır ki, “Azadlıq” qəzetinin redaktoru Rahim Hacıyev ağır maliyyə durumu üzündən fəaliyyətlərini dayandıracaqlarını bəyan edib.

Parlament seçkilərinə münasibətlə bağlı Milli Şuranın parçalanacağını yazan qəzet Müsavat Partiyasının hökumətlə şəxsi düşmənçiliyi olan siyasilərin girovuna çevrilmək istəmədiyi barədə bəyanat verdiyini qeyd edir.  

Ekspertlər Avropa İttifaqının Vilnüs sammitində rəsmi Bakının verəcəyi qərarın məmurların maraqlarına uyğun olacağı” sensasion bəyanatını səsləndiriblər. 

“Yeni Müsavat” dövlət başçısı İlham Əliyevin müxalifətə dialoq təklifini ilk səhifəyə çıxararaq müxalifət düşərgəsinin də təklifin reallığa çevrilməsini gözlədiyini qeyd edir. 

Ekspertlər İran-ABŞ anlaşmasının Azərbaycan və Türkiyəyə müsbət heç nə vəd etmədiyini bildiriblər. 

Hərbi Dəniz Qüvvələrində total yoxlamaların başladığını yazan qəzet vitse-admiral Şahin Sultanovun həbs olunmaq təhlükəsinin yarandığını bildirir. 

Pirqulu rəsədxanası ətrafında tikilən xüsusi villaların işıqlandırılması üzündən gecələr səmanı müşahidə edə bilməyən rəsədxana fəaliyyətini dayandırmağ məcbur olacağını bəyan edir. 

Qəzet bu günlərdə Zaqatalada baş verən atışmanı kriminal aləmin “razborkası” olduğunu, artıq həbsxanalarda bu haqda danışıldığını nəzərə çatdırır.

Qəzet ölkədə 4171 nəfərin  QİÇS-ə yoluxduğunu, 578 nəfərin artıq vəfat etdiyini bildirir.