Mətbuat-Monitorinq 28.06.14

Rəsmi qəzetlər Azərbaycan Silahlı Qüvvələrinin yaradılmasının 96-cı ili ilə bağlı Müdafiə, Daxili İşlər nazirlikləri və Dövlət Sərhəd Xidmətinə aid birləşmə və hissələrin birgə keçirdiyi əməliyyat-taktiki təlimə dair xəbərlərə geniş yer veriblər.

“Azadlıq” qəzeti Almaniyanın məşhur “Şpigel” jurnalındakı məqalədə İlham Əliyevi “tiran” adlandırmasını ilk səhifəyə çıxarıb.

Qəzet yazır ki, övladları türk liseylərində təhsil alan bir qrup valideyn bu liseylərin bağlanmasına etiraz olaraq parlament önündə aksiya keçirib.

Dövlət məmurunun bizneslə məşğul olmaq hüququ olmamasına baxmayaraq, PA ictimai-siyasi şöbəsinin müdiri Əli Həsənov mətbuatda ona məxsus biznes qurumlarının açıqlanmasına “utanmağa, çəkinməyə hər hansı əsasi” olmadığını  bəyan edib.

Ekspertlərə görə, Azərbaycanın Ümumdünya Ticarət Təşkilatına üzvlüyə yekun qərar verməməsi məqsədli xarakter daşıyır və bu oliqarxların maraqlarına uyğundur.

Qəzet satınalmalarda Balakəndəki Dibirovlar ailəsinin son 4 ildə keçirilən tenderləri udmasının həqiqiliyini şübhə altına alır, bu məsələnin Dövlət Satınalmalar Agentliyi və “Pasha Construction” şirkətinə bağlı olduğunu iddia edir.

“Ekspress” RF tərəfin Azərbaycanı Avrasiya inteqrasiyasının iştirakçısı görmək istəyi barədə açıqlamasını önə çəkərək bunu “Moskvanın Bakıya diqqəti artırması” hesab edir.

İqtidarpərəst “İrəli” gənclər təşkilatının konfransında çıxış edən PA ictimai-siyasi şöbəsinin müdiri Əli Həsənov qurumu əqidəsizlikdə ittiham edib.

“Novoe Vremya”  Avropa İttifaqı və Avropa Şurası rəhbərlərilə Ukrayna prezidenti Poroşenkonun fotosu fonunda “kim oyunçu, kim əlaltı” deyə Ukraynanı təhqirə məruz qoyur.

“Bizim yol”  daim iqtidarı müdafiə edən deputat Fəzail Ağamalının  nəvələrinin təhsil aldığı türk liseylərinin bağlanması ilə bağlı “nəvələrimi dövlət məktəblərinə qoymayacağam, çünki o liseylərdəki səviyyə yoxdur”  deyərək dövlət məktəblərini tənqid etməsini nəzərə çatdırır.

“Yeni Müsavat”  Rusiyanın Azərbaycanı Avrasiya İqtisadi İttifaqına daxil etmək üçün işğalda olan 6 rayonu qaytarmasına hazır olması iddiasını ilk plana çıxararaq bunu “Moskva ilə Bakının “qızıl orta” axtarışında olması” adlandırır.

Müsavat partiyasının başqanı İsa Qəmbər Azərbaycanın Avropa İttifaqı ilə assosiativ saziş imzalamaqdan kənarda qalmasını “iqtidarın böyük yanlışı” adlandırıb.