Mətbuat-Monitorinq 28.09.12

Rəsmi qəzetlər dövlət başçısı İlham Əliyevin Zabrat-Maştağa- Buzovna yolunun yenidən qurulmasından sonrakı vəziyyətlə tanış olması, Bakıda keçirilən “Körpülərin salınması” beynəlxalq konfransın iştirakçılarını qəbul etməsi haqda yazırlar. 

“Azadlıq” qəzeti ölkə prokurorluğunun deputat Gülər Əhmədova ilə keçmiş rektor Elşad Abdullayev arasında deputatlıqla bağlı rüşvət qalmaqalının araşdırılmadığını yazır və ekspertlər bunu “Azərbaycanın hüquqi dövlət olmaması, prokurorluğun iqtidardan asılı olması” ilə əlaqələndirir. 

ABŞ-ın Azərbaycanda səfiri R.Morninqstar “Müsəlmanların məsumiyyəti” filmini “iyrənc və mənfur” adlandırıb.

Qarabağ münaqişəsi ətrafında duruma şərh verən Azərbaycan xarici işlər nazirinin müavini Araz Əzimov münaqişənin həlli üçün nəzərdə tutulan “əsas prinsiplərin torpaqların qaytarılmasını nəzərdə tutmadığı” bəyanatını verib. 

KXCP-nin sədr müavini Ədalət Yusibov deputat Gülər Əhmədova ilə rektor Elşad Abdullayev arasındakı deputatlığa dair rüşvət qalmaqlaı ilə bağlı İctimai Palatanın beynəlxalq qurumlara müraciət edəcəyini bildirib. 

Dövlət başçısı İlham Əliyevin əmisi Cəlal Əliyevin vaxtilə biznes ortağı olmuş Sədiyar Zeynalov C.Əliyevin ona olan təzyiqləri və hədələrilə bağlı İ.Əliyevə müraciət ünvanlayıb.  

“Zerkalo”. Xarici işlər nazirinin müavini Araz Əzimov Qarabağ münaqişəsini tənzimləməli olan Minsk Qrupunun fəaliyyətini “qrupun tükənməsi” kimi dəyərləndirib.

“Ekspress” İran parlamentinin Güney Azərbaycanda baş vermiş zəlzələ ilə bağlı müzakirələri gündəlikdən çıxarmasını “Güney Azərbaycan türklərinə qarşı qəsd-qərəz” adlandırır.  

Ölkədə 60 minə yaxın əlil uşaq var. Onlardan yalnız 1005 nəfəri xüsusi, 2664 nəfəri isə xüsusi internet məktəblərdə təhsil alır. 

Güney Azərbaycanın milli fəallarından olan və türk dilində yazan Səid Muğanlının evi yandırılıb. 

“Novoe Vremya” qəzeti deputat Gülər Əhmədova ilə keçmiş rektor Elşad Abdullayev arasında deputat olmağa dair rüşvət qalmaqalının ardınca keçmiş rektor “belə ifşalara dair əlində xeyli videogörüntülərin olduğu” haqda açıqlama verib.  

“Bizim yol”  yazır ki, hüquq müdafiəçisi Mirvari Qəhrəmanlı “Xəzər TV”nin “Həyata baxış” proqramında neft şirkətini kəskin tənqid etdiyi üçün ARDNŞ prezidenti Rövnəq Abdullayev proqramı bağlatdırıb.    

Dillər Universitetində aşkarlanan yeyintilərə görə rektor Səməd Seyidovun həbs olunma ehtimalı var. 

“Yeni Müsavat” deputat Gülər Əhmədova ilə keçmiş rektor Elşad Abdullayev arasındakı deputat olmaqla bağlı rüşvət qalmaqalına görə G.Əhmədovanın cəzalandırılması üçün “siyasi fətva”nın verildiyini iddia edir. 

Mərkəzi Bank bankların minimum nizamnamə kapitalını 10 milyon manatdan 50 milyon manata qaldırmaqla 19 bankı sıradan çşıxarmağa hazırlaşır. 

Gənc müsavatçı Nigar Yaqublunun barəsində həbs qətimkan tədbiri dəyişdirilmədiyi üçün müdafiə tərəf Avropa Məhkəməsinə müraciət etməyə, ölkə həbsxanalarında olan siyasi məhbuslar isə N.Yaqublunun müdafiəsilə bağlı aksiyalara hazırlaşırlar.