Mətbuat-Monitorinq 29.03.13

Rəsmi qəzetlər dövlət başçısı İlham Əlyevin qəbulları və səfir təyinatları ilə bağlı sərəncamlarının mətnlərini dərc ediblər. 

“Azadlıq” qəzeti Moskvada azərbaycanlılardan ibarət şərti “milyarderlər ittifaqı”nın rəhbəri Abas Abasovun yaxın qohumu Qoca Quliyevin qanunsuz silah gəzdirmək adı ilə Gəncədə həbsə alınmasını manjetə çıxarıb.

Sərhəd qoşunlarının Göytəpədəki hərbi hissəsində əsgərlər arasında insident baş verib, döyülən və bıçaqlalan əsgər Surət Məmmədov hospitala yerləşdirilib. 

Azərbaycanın Rumıniyadakı səfiri Eldar Həsənov geri çağırılıb, onun fəaliyyətini Serbiya, Bosna-Herseqovinada davam etdirəcəyi gözlənilir.   

“Avtoritar” İlham Əliyevin Xorvatiyaya səfəri  bu ölkə QHT-ləri tərəfindən elə narazılıqla qarşılanıb ki, baş nazir  buna “bəli, Azərbaycan demokratik ölkə deyil, amma “diktatorla görüşmüsüz” deyə üstümüzə də yeriməyin” şərhini verib. 

Polis Zaqatalada zəlzələdən zərər çəkən vətəndaşların, Ağsuda isə dindarların tədbir keçirməsinə imkan verməyib. 

MTN ali məktəblərə qanunsuz tələbə qəbulunun “izi”nə düşüb, bu faktla bağlı 26 cinayət işinin istintaqı aparılır.

“Zerkalo” yazır ki, Azərbaycan, Türkiyə və Gürcüstan XİN başçılarının Batumi  görüşündə bu ilin sonuna kimi Bakı-Tbilisi-Qars dəmiryolu ilə ilk qatarın səfərə gedəcəyi bəyanatını veriblər.

Bu ilin 3 ayı ərzində 684 sürücü sərxoş halda saxlanılıb.

“Ekspress” yazır ki, Təhsil Nazirliyi ölkədə 12 illik təhsilə keçidlə bağlı plan hazırlandığı haqda açıqlama verib.

“Exo” il ərzində Azərbaycan sakinlərinin 3 milyarda yaxın dollar almalarını, bir qisminin kommersiya banklarında, digər qisminin isə vətəndaşların özlərində saxlamalarını ilk plana çıxarıb. 

“Novoe Vremya” son vaxtlar iqtidarla müxalifət arasında dialoq səslənmələrinə “ölkədə insan haqlarına hörmət edilmirsə, heç bir dialoq kömək edə bilməz” mövqeyini ifadə edib.

“Bizim yol” baş prokuror Zakir Qaralovun MDİ ilə bağlı ABŞ-ın Azərbaycan səfirinə göndərdiyi məktubda MDİ-ni 1 milyon dollarlıq korrupsiyada ittiham edib.

Sərhəd qoşunlarının Göytəpədəki hərbi hissəsində zabit əsgəri bıçaqlayıb.

YAP-çı deputat Siyavuş Novruzovun sosial şəbəkələrə nəzarətlə bağlı qanun qəbul olunması təklifinə bir sıra QHT-lər “belə çıxışlar ölkənin nüfuzuna xələl gətirir” mövqeyini ifadə ediblər. 

Tarixçi professor Cəmil Həsənli ölkədəki ictimai-siyasi duruma “dözüm həddi bitəndən sonra məzlumlardan meydan cəngavərləri yaranır” şərhini verib.

“Yeni Müsavat” “milyarderlər ittifaqı”nın rəhbəri Abas Abasovun qohumu Qoca Quliyevin həbsi ilə bağlı Q.Quliyevin xanımı A.Abasovun qohumu olduqlarına görə incidilmələri barədə açıqlama verib.

Bakı dəmir yolunun köçürülməsi üçün layihədə real dəyərdən qat-qat artıq maliyyə vəsaitinin göstərildiyinə görə maliyyə naziri layihəni rədd edib və bu iki nazir arasında qalmaqal yaradıb. 

Rusiyada yaşayan azərbaycanlı milyarder Söyün Sadıqov Azərbaycanda “ləzgi problemi”nin olduğunu iddia edir, bu bölgədən deputat Vahid Əhmədov isə olmadığını bildirir. 

Bir neçə il öncə “Azadlıq” meydanından Zığ dairəsinə qədər çəkilmiş beton yolun 30 il ərzində təmirə ehtiyacı olmayacağı deyilsə də son 3 ildə 3 dəfə təmir edilib.