Mətbuat-Monitorinq 30.01.15

Rəsmi qəzetlər  dövlət başçısı İlham Əliyevin Qusar rayonunda “Şahdağ” qış-yay turizm kompleksində “Park Chalet” otelinin açılışında iştirak etməsi haqda xəbəri ilk səhifələrdə yerləşdiriblər.

“Azadlıq” qəzeti Şəmkirin keçmiş icra başçısı Aslan Aslanovun oğlunun 13 il öncə baş vermiş qətlinə görə ömürlük həbs cəzası almış Vüqar Əliyevin xanımına  isnadən o zaman icra başçısının bu qətli nazir Fazil Məmmədovun üzərinə yıxmaq istəməsi haqda açıqlamasını ilk səhifəyə çıxarıb. Bu qətldə təqsirli bilinən digər məhkum Lamiyə Quliyevanın təcridxanada ana ola bilməsinə Milli Şuranın sədri Cəmil Həsənli “Penitensiar Xidmətin, prokuroluq və məhkəmənin birgə zorladığı Lamiyə” münasibətini bildirib.

Qəzet AXCP fəalı Seymur Həzinin Abşeron məhkəməsində cinayəti sübut olunmadığı halda belə 5 il həbs cəzası almasını nəzərə çatdırır.

Qəzet qeyd edir ki, həbsdə olan jurnalsit Xədicə İsmayılın plakatlarını Şəkidə yaydıqlarına görə AXCP Şəki təşkilatının sədri Rauf Əbdürrəhmanlı 20 sutka inzibati həbs cəzası alıb.

Siyasi motivli həbslərin istintaqı zamanı zərərçəkən kimi tanınanların məhkəmədə bundan imtina etmələrini qəzet “hakimiyyəti ifşa edən “zərərçəkənlər” kimi dəyərləndirir.

“Ekspress”  Azərbaycan, Türkiyə və Türkmənistan xarici işlər nazirləri Məmmədyarov, Çavuşoğlu və Meredovun Aşqabad görüşünü diqqət mərkəzinə çəkib.

Tələbə Qəbulu üzrə Qəbul Komissiyasının sədri Məleykə Abbaszadə olimpiya oyunları ilə bağlı Bakı şəhəri üzrə builki buraxılış imtahanlarının iyunun 7-nə kimi başa çatacağını bildirib. 

“Exo”   Azərbaycanın 6 milyon 347 min vətəndaşının öz əmanətlərini ölkə banklarında saxlaması haqda xəbəri ön plana çəkib.

“Bizim yol” AŞPA sessiyasında Rusiyaya qarşı sanksiyalarda Azərbaycanın Rusiyanı dəstəkləməsini önə çıxarıb.

“Yeni Müsavat”   AŞPA sessiyasında Azərbaycanla bağlı gərgin müzakirələrin keçməsini və AŞ insan haqları komissarının sərt çıxış etməsini önə çəkib.

Nəqliyyat Nazilriyi müfəttişlərinin zorakılığına görə bir neçə gün öncə özünü yandıran sürücünün durumu ağırdır, hüquqşünaslar bu əmələ görə müfəttişləri 8 ilə qədər azalıqdan məhrum etməyin mümkünlüyünü bildiriblər.