Mətbuat-Monitorinq 30.06.14

Rəsmi qəzetlər dövlət başçısı İlham Əliyevin Bakıda keçirilən ATƏT PA-nın XXIII illik sessiyasının plenar iclasının açılış mərasimində iştirakı haqda xəbəri ilk səhifələrə yerləşdiriblər.

“Azadlıq” qəzeti Moldovanın türklər yaşayan Qaqauziya bölgəsində Heydər Əliyevə abidə qoyulması üçün rəsmi Bakının qalmaqallara əl atmasını “Moldovada Heydər Əliyev qalmaqalı” adlı araşdırma yazısında önə verib.

Hərbi ekspert Üzeyir Cəfərli Ermənistanın işğalda olan rayonlardan Ağdam, Füzuli və Cəbrayılı qaytarmağa hazır olduğunu, əvəzində Azərbaycanın Avrasiya İqtisadi İttifaqına üzv olması şərti qoyulduğunu nəzərə çatdırır. 

Qəzet deputat Elmira Axundovanın oğlunun, sürücüsünün, Bülbül prospekti 65-dəki özbaşnalığından qonşuların şikayətçi olduqlarını nəzərə çatdırır.

Qəzetin yazdığına görə, vəkil Əlabbas Rüstəmov vəzifəli şəxsə rüşvət verməkdə  ittiham olunub.Onun  barəsində 3 aylıq həbs qətiimkan tədbiri seçilib.

Azərbaycanda Əliyevləri insan haqlarının ağır durumuna görə tənqid edən “Əl-Cəzirə” telekanalı buna “bu ölkədə insan haqlarının durumu iyrənc olsa da bu ölkə Avropa Şurasının Nazirlər Komitəsinə rəhbərlik edir” mövqeyini ifadə edir.

Qəzet ATƏT PA-nın Bakı sessiyasında Azərbaycanda siyasi məhbus məsələsinin qaldırıldığını,  Milli Məclisin üzvü Rəbiyyət Aslanovanın ölkədə siyasi məhbusun olmasını inkar etməsini nəzərə çatdırır.

KİV-lərə Dəstək Fondunun 33 qəzetə maddi yardım etməsinə toxunan qəzet bu yardımların çoxunun mətbuat sahəsini kurasiya edən Əli Həsənovun tabeliyində olan qəzetlərə ayrıldığını nəzərə çatdırır.

ATƏT PA-nın Bakı sessiyasını təhlil edən ekspertlər bununla qurumun İlham Əliyevə “sən gəlməzsən biz gələrik, yola gəlməzsən bir yolun taparıq” mesajını verdiklərini iddia edir.

 “Yeni Müsavat” ATƏT PA-nın Bakı sessiyasında işğal faktına qarşı Azərbaycan və Ukraynanın eyni mövqedən çıxış etməsini “Bakı və Kiyevin Ermənistana qarşı vahid cəbhədə” olması kimi dəyərləndirərək önə çəkib.

Ekspertlər ölkə iqtisadiyyatında məyusedici meyllərin, azalmaların büdcə gəlirlərində, idxalda, ixracda qeydə alındığını nəzərə çatdırırlar.

Gürcüstan, Moldova və Ukraynanın Avropa İttifaqı ilə assosiativ saziş imzalamasına işarə edən qəzet faktı “GUAM-ın 3 ölkəsinin Azərbaycandan önə keçməsi” kimi dəyərləndirir.

2011-ci ilin mayında həbsə alınan baş leytenant Asif Lətifovun adı siyasi məhbuslar siyahısına salınıb.

Türkiyə hökumətinin ətrafında qalmaqal yaratdlığı, hazırda ABŞ-da yaşayan Fətullah Gülənin tərəfdarları Türkiyədə Haqqa Hizmət Partiyasını (HHP) qurur, 8 deputat bu sıraya qatılır.

Politoloq Vəfa Quluzadə Rusiyanın Qarabağı qaytaracağı barədə danışıqları “boş söz-söhbət”  və Azərbaycanı Avrasiya İttifaqına daxil olmağa məcbur etmək” istəyi kimi dəyərləndirir.