Mətbuat-monitorinq 31.07.15

Rəsmi qəzetlər “mövcud siyasi kursun xalq tərəfindən dəstəklənməsi, Avropa Oyunlarının yeri, kənd təsərrüfatının dinamik inkişafı” kimi iqtidarı təbliğ formatlı məqalələri ilk səhifələrdə yerləşdiriblər.

Bundan əlavə, bu qəzetlər uzun müddət xalqa dəyərindən 8-13 dəfə baha satılan dərmanların bu ilin sentyabrından yeni qiymətlərlə satılacağı haqda Tarif Şurasının qərarını və  dərmanların siyahısını dərc ediblər.

 “Azadlıq” qəzeti Azərbaycan da daxil olmaqla, heroin yüklü avtomobilin bir neçə ölkədən keçərək Rumıniyada saxlanılması iddiasını “Azərbaycanın adı 333 kq narkotika qalmaqalında” kimi ilk səhifəyə çıxarıb.

İnsan haqları blokunda qəzet yazır ki, REAL Hərəkatının Məclis sədri Razim Rzayevə 6 sutka inzibati həbs verilib.

Milli Məclis sədri Cəmil Həsənlinin 12 yaşlı nəvəsinə ölkə prokurorluğu çağırış göndərib, sonra isə geri götürüb.

Qəzet son zamanlar ictimai fəalları narkotik ilə şərləyərək həbsə alan rəsmi Bakının adının tonlarla narkotik qalmaqalında hallanmasına diqqət çəkir.

ABŞ Dövlət Departamentinin Azərbaycanda insan haqlarının pisləşməsinə dair bəyanatını müxalif siyasətçilər “ABŞ-la münasibətlərin hələ də normallaşmaması”nın göstəricisi sayırlar.   

İqtisadi blokda aparılan statistik araşdırmalara toxunan ekspertlər bütün sahələr üzrə vergi azalmalarını “iqtidarın inkişaf nağılının vergi ifşası” adlandırır. 

Beynəlxalq blokda ABŞ Dövlət Departamentindən Azərbaycana “ölkədə sistemli korrupsiyanın insan alverinə qarşı mübarizədə əsas maneə olması” tənqdidi əksini tapır.

 “Ekspress” qəzeti ABŞ Dövlət Departamentinin Azərbaycanda insan haqlarının pisləşməsilə bağlı bəyanatına Azərbaycan XİN-in “ABŞ-ın özünü “qlobal himayədar kimi göstərməsi”” mövqeyini “XİN-dən Departamentə sərt cavab” kimi ön plana çıxarıb.

Qəzet Tarif Şurasının qərarı ilə sentyabrın 15-dən 250-dən çox preparatın aşağı qiymətlərlə satılacağına diqqət çəkir.

Rusiyadan Azərbaycana pul köçürmələrinin 50% azaldığını yazan qəzet bunu Rusiyadakı azərbaycanlıların iş yerlərini itirməsi və gəlirlərinin azalması ilə əlaqələndirir.

Rejissor Ramiz Fətəliyev yazıçı Anarın M.F.Axundov haqda filmini “çox keyfiyyətsiz televiziya filmi” adlandırıb.

“Exo” qəzeti Azərbaycanda yetimlərə daşınmaz əmlak verilməsinin planlaşdırıldığını diqqət mərkəzinə çəkərək, ekspertlərə isnadən regionlarda belə evlərin tikintisinə artıq başlandığını bildirir.

“Novoe Vremya” qəzeti ABŞ Dövlət Departamentinin Azərbaycanda insan halqarının pisləşməsilə bağlı bəyanatını “Bakının oyun qaydalarını pozmaqda davam etməsi” kimi ilk plana çıxarıb.

“Bizim yol” qəzeti Tarif Şurasının 250 preparatın sentyabr ayından yeni qiymətlərlə satılması haqda qərarını, işbazların indiyə kimi dərmanları əhaliyə real qiymətindən 8-13 dəfə baha satması barədə açıqlamanı ilk səhifəyə yerləşdirib.

“Yeni Müsavat” qəzeti AZAL prezidenti Cahangir Əsgərovun hədəfə gəlməsinin səbəbi kimi baş nazirin keçmiş birinci müavini Abbas Abbasovla və milyarder Telman İsmayılovla dostluğu hələ də davam etdirməsini göstərərək, bunu Cahangir Əsgərovun “biletinin kəsilməsi” kimi önə çəkir.

Qəzet ABŞ-ın “Mother Cones” məcmuəsinin nəqliyyat naziri Ziya Məmmədovun oğlu Anar Məmmədovun ABŞ prezidentliyinə namizəd Donald Trampa 2,5 milyon dollar verdiyini iddia etdiyini yazır.

“KİA” və “Parabank”ın müştərək cinayət əməlinə görə hər iki qurumda yoxlama başladığını yazan qəzet buna qədər mətbuatın “KİA Motors”un “Parabank”da qeydiyyata alnmadan 40 milyon manat vəsait saxlaması haqda yazdığını xatırladır.

Qəzet “Xəzərdənizgəmiçilik” QSC-nin keçmiş rəhbəri Aydın Bəşirovun “Yaxt klub” önündə oğurlanan yaxtanın oğluna mənsub olmasını inkar etməsinin yalan çıxdığını nəzərə çatdırır.

ABŞ prezidenti Barak Obamanın avtoritar rejim başçılarına “ömürlük prezident olmaq olmaz” çağırışına hökumətyanlı deputat Fəzail Ağamalı “dünya ABŞ prezidentinin sözü ilə oturub durmur” “müdrikliyi” ilə cavab verib.