Mətbuat Rəşad Əlizadənin axtarışında "qaçağı tapıb"

Bakı/07.02.19/Turan: Ermənistan KİV-lərinin Azərbaycandan Rəşad Əlizadə adlı qaçaq haqqında məlumatları çox səs-küyə səbəb olub.

Yerli moderator.az saytı bu şəxs haqqında məlumat axtarmaq qərarına gəlib və bu şəxsin 400 min manat borcu olan Rəşad Əlizadə olduğunu təxmin edib. 2017-ci ildə onun ölkədən çıxışı qadağan edilib.

Amma Turan agentliyi həmin Rəşad Əlizadə ilə əlaqə saxlayıb, o, Qarabağdan vətəndaşlıq istədiyi haqqında məlumatı təkzib edib.

"Separatçılara yazılan və edilən müraciətlə əlaqədar mənim heç bir əlaqəm yoxdur. Sözü gedən Rəşad Əlizadə hər kimdirsə, onu tanımıram. Hər Rəşad Əlizadələrə görə də heç bir məsuliyyət daşımağa borcum da yoxdur.

Bəli, vergi ilə əlaqədar problemim olub və o problem öz həllini tapıbdır, ona da görə xahiş edirəm mənim adımı bu cür xəbərlərdə hallandırmayasınız!

Ən azından dövlətin lazımi orqanları da bilir ki, 2010-cu ildə xidmətdə olan Rəşad Əlizadə üçün dövlətinin maraqları hər şeydən vacibdir, ərazi bütövlüyü mənim üçün ailə bütövlüyündən də önəmlidir. Ona görə də sözü gedən Rəşad hər kimdirsə, xahiş edirəm, məni onunla eyni xəbərdə rastlaşdırmayasınız", deyə o bildirib.

Xatırladaq ki, Ermənistan tərəfin Rəşad Əlizadə adlı şəxs haqqında bugünki məlumatının davamı gəlməyib, xəbərin təfsilatı naməlum olaraq qalır.

Azərbaycan hakimiyyəti də bu məlumatı şərh etmir. -02B-