Mətbuatın monitorinqi - 22.06.13

Rəsmi və iqtidaryönlü qəzetlər dövlət başçısı İlham Əliyevin Belçika Krallığında Avropa İttifaqı Şurasının başçısı Herman Van Rompeylə (bütün iqtidaryönlü qəzetlər onun soyadını Rompuy kimi verib) və Avropa Komissiyasının sədri Xose Manuel Barrozu ilə rəsmi görüşləri haqda yazırlar.

   İyunun 21-də Bakıda BMT-nin təşkilatçılığı, ARespublikası prezidenti administrasiyasının rəhbəri Ramiz Mehdiyevin sədrliyi ilə “Azərbaycanda 2015-ci ildən sonrakı dövr üçün milli məsləhətləşmələrin nəticələrinin təsdiqi” mövzusunda konfransın işi də geniş işıqlandırılıb.

   İyunun 21-də Türkdilli Dövlətlərin Əməkdaşlıq Şurasına üzv ölkələrin diaspor təşkilatları rəhbərlərinin I forumu keçirilib. Ölkə başçısının təbrikində dünyanın hansı ölkəsində yaşamasından asılı olmayaraq soykökünə, tarixinə, milli mənəvi dəyərlərinə ehtiram, doğma vətənin maraqlarına bağlılıq nümayiş etdirən bütün türklərin birliyinin vacibliyi vurğulanır.

   Bundan əlavə, rəsmi qəzetlərdə Azərbaycan Respublikası Nazirlər Kabinetinin bir sıra sosial yönlü Qərarı və Sərəncamı dərc edilib.

  Bununla yanaşı bu qəzetlər ölkənin etiraz elektoratını ətrafında birləşdirən Milli Şura ilə bağlı yalan, böhtan və iftira səpgili yazıları davam etdirirlər.

   “Azadlıq”. Dövlət başçısının Avropa İttifaqı rəhbərliyinə və dəyərlərinə sadiqliq andı içdiyi zaman ölkə deputatları Avropa Parlamentinin siyasi məhbuslara azadlıq tələb edən qətnaməsini pislədi, “Avropa bizə yol göstərməsin” dedi.

   İyunun 21-də Müsavat partiyasının başqanı İsa Qəmbərin sədrliyi ilə Milli Şuranın ilk sessiyası keçirildi. Ölkədəki ictimai-siyasi vəziyyət dözümsüz, Milli Şuranın qarşısında duran vəzifələr təxirəsalənmaz və məsuliyyətli kimi qiymətləndirildi.

   Hakimiyyətin hədəfə aldığı insanların sayı artır. Belə ki, Baş nazirin sabiq müavini Abbas Abbasova qarşı 1992-ci ildə Laçın rayonunun boşaldılmasına görə ittiham hazırlanıb, AR prezidenti Administrasiyasının İşlər İdarəsinin keçmiş müdiri Akif Muradverdiyevin 18 min manatı bəyannamədə göstərmədən xaricə çıxarması adı ilə barəsində həbs qətimkan tədbiri seçilib və o, MTN təcridxanasında saxlanılır.

    Avropa Parlamentinin siyasi məhbuslara azadlıq tələb edən qətnaməsi Milli Məclisin 21 iyun tarixli plenar iclasında pisləndi, “Azərbaycanın penitensiar müəssisələrində siyasi məhbuslar deyil, Cinayət Məcəlləsinin tələblərini pozan vətəndaşlar saxlanılır” deyildi. 

   “Zerkalo” hökumətin vətandaşlara qarşı repressiyalarını dəstəkləyən hüquq müdafiəçilərinin artdığını, Milli Şuranın İclasında ölkə prezidentliyinə vahid namizədin seçilməməsini, Avropaya qaz nəqlinin Əliyev rejiminə siyasi loyallığının qarşılıqlığı məsələsini qabardır.    

   “Ekspress” Vaşinqtondakı (ABŞ) Dağlıq Qarabağa həsr olunan konfransdan yazır. Təkrar nəşr olunan “Qara bağ” kitabının müəllifi Tomas De Vaal regionda müharibə ehtimalının artmasından, Azərbaycanın gücləndikcə bütün itirilən ətraf ərazilərə iddialı olacağından yazır.

  “Exo” ölkədə ölümdən sonrakı donorluq haqqında referendumu və Bakı – Tbilisi – Qars dəmir yolundan istifadə edən ölkələri consensus metodu ilə təyin etmək məsələsini vacib sayır.

   “Novoe Vremya” yazır ki, Avropa İttifaqı Azərbaycandakı demokratik prosesləri və ictimai dəyərləri geosiyasi oyunlarla nəql edilən neftlə qaza qurban verdi. ABŞ-ın Saakaşviliyə dəstəyinə geniş icmal həsr olunub. 

   “Bizim yol” Milli Şuranın ilk iclasında baş verən narazılıqdan yazır. Ondan əlavə, Azərbaycan Beynəlxalq Universitetinin mühacir həyatını yaşayan sabiq rektoru Elşad Abdullayevin qardaşı, MTN-in oğurlanmış mayoru Mahir Abdullayevlə bağlı cinayət işində yeni təfərrüatlar açıqlandı – fiqurantlardan biri həbs edilmiş biznesmen – polis Arzu Kazımov Mahirin öz qardaşları tərəfindən oğurlandığını iddia edir.        

   “Yeni Müsavat” AR prezidenti Administrasiyasının İşlər İdarəsinin keçmiş müdiri Akif Muradverdiyevin həbsini hakimiyyətin Qərbi Azərbaycandan olanlara rejimə qarşı çıxmamaq mesajı kimi qiymətləndirir. 

   Qəzet Milli Şuranın planlarından yazır. Belə ki, qurumun bir neçə komissiyası və 2 illik keçid müddəti üçün xüsusi platformasını hazırlayacaq İşçi Qrupu yaradıldı, yeni üzvlərin qəbul edildiyi tədbirdə vahid namizəd məsələsi yenə gərginlik yaratdı. --17D—