MHİ BDU rəhbərliyinin Altay Göyüşova təzyiqlərini pisləyib

  Media Hüququ İnstitutu Bakı Dövlət Universitetinin (BDU) müəllimi Altay Göyüşovun sosial şəbəkələrdəki tənqidi çıxışlarına görə işdən çıxarılmasını qətiyyətlə pisləyir. MHİ bunu ifadə azadlığına ciddi qorxu yaradan zərərli addım sayır.

Tarix elmləri doktoru, professor, Bakı Dövlət Universitetinin müəllimi A.Göyüşov islam tarixi sahəsində Azərbaycanda və ölkədən kənarda nüfuzlu alimlərdən sayılır. O, həm də hökumətə müxalif REAL Hərəkatının İdarə Heyətinin üzvüdür. Həmin hərəkatın sədri İlqar Məmmədov 10 aydan artıqdır ki, qurama ittihamlarla həbsdədir.

Sosial şəbəkələrdə, mediada siyasi məzmunlu tənqidi çıxışları ilə də tanınan Altay Göyüşov noyabrın 13-də BDU-da dərsdəykən auditoriyadan çıxarılıb. Onun BDU-dakı fəaliyyətinə son verilib. Professor bunun tənqidi çıxışları ilə bağlı olduğunu bəyan edib.

MHİ insanlara, özəlliklə tanınmış ictimai fiqurlara fikirlərinə görə ayrı-seçkilik edilməsi tendensiyasından dərin narahatlığını ifadə edir. MHİ dərin təəssüflə ölkədə hökuməti tənqid, müxalif ideyaları təbliğ edən, çoxluğun və ya çoxsaylı qrupların düşüncələrinin ziddinə ifadə azadlığı sərhədləri içində ifadələr işlədən tanınmış insanların basqılara məruz qalması kimi bədnam təcrübənin formalaşdığını xatırladır. 2011-ci ilin noyabrında akademik Rafiq Əliyev hökumətə yönələn tənqidi çıxışlarının ardınca Azərbaycan Dövlət Neft Akademiyasındakı işindən çıxarılıb. 2013-cü ilin fevral ayında yazıçı Əkrəm Əylisli “Daş yuxular” adlı romanına görə gözdənsalma kampaniyası ilə üzləşib. Bir neçə gün bundan əvvəlsə müxalif siyasi partiyaların birliyi olan Milli Şuranın prezidentliyə keçmiş namizədi Cəmil Həsənlinin yaxın qohumu da siyasi motivlərlə Bakı Dövlət Universitetindəki vəzifəsindən azad olunub. 

MHİ baş verənlərin Azərbaycanda əsas insan hüquq və azadlıqlarına, özəlliklə də ifadə azadlığı hüququna ciddi qorxular doğurduğunu, ifadə olunan bədnam mənzərənin Azərbaycanı mütərəqqi dünyanın gözündən saldığını bəyan edir. 

MHİ fərdi rəylərə qarşı dözümlülüyün demokratik sitemlərin mühüm komponenti olduğunu vurğulayaraq, hökuməti A.Göyüşova düşüncələrinə görə basqıya son qoyulmasını təmin etməyə, professorun, eləcə də eyni kontekstdə basqılara məruz qalan digər şəxslərin pozulmuş hüquqlarını dərhal təmin etməyə çağırır.06D--