MHİ: Hakimiyyətin tənqidə dözümü sıfır həddinə çatıb

Xətai Rayon  Məhkəməsinin tənqidçi jurnalist Sərdar Əlibəylini 4 il, Bakı Ağır Cinayətlər Məhkəməsinin bloger Rəşad Ramazanovu 9 il müddətinə azadlıqdan məhrum edən hökmləri Azərbaycanda ifadə azadlığının boğulmasına yönələn ən ağır basqılardandır. Bu barədə Media Hüququ İnstitutunun bəyanatında bildirilir. MHİ  məhkəmə araşdırması zamanı təsdiqini tapmamış quram ittihamlar əsasında çıxarılan bu hökmləri kəskin qınayır, jurnalistin və bloqçunun susdurulmasının hökumətin tənqidə dözümünün sıfır həddinə çatmasının, tənqidçi şəxslərin çox böyük risk altında olmasının göstəricisi olduğunu vurğulayır. 

 “p.s.Nota” qəzetinin və www.psnota.com portalının hökuməti çox sərt tənqid edən təsisçisi və baş redaktoru Sərdar Əlibəyli 2013-cü ilin iyul ayının 31-də Xətai rayon Polis İdarəsinin əməkdaşları tərəfindən zorla saxlanılıb. Şahid qismində saxlanılan jurnalistə qarşı sonradan xuliqanlıq (Cinayət Məcəlləsi, maddə 221.3) ittihamı irəli sürülüb. S. Əlibəylinin tanımadığı şəxsə xəsarət yetirdiyi iddia olunub. 

  Sosial şəbəkələrdə hökumətə yönələn çox sərt, bəzən ifadə azadlığının sərhədlərini zorlayan ifadələr işlədən bloger R. Ramazanovsa may ayının 9-da Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin (DİN BMCMİ) əməkdaşları tərəfindən saxlanılıb. Bloger 10 gündən artıq qanunsuz olaraq DİN BMCMİ-də tutulub, ona işgəncələr verilib. Üzərində narkotik maddə aşkar edildiyi deyilən bloger qanunsuz olaraq külli miqdarda narkotik vasitələri saxlamaq və satmaqda (Cinayət Məcəlləsi, maddə 234.4.3) ittiham olunub. 

Həm S. Əlibəyli, həm də R.Ramazanov bildiribr ki, ittihamlar quramadır, həbs olunmalarının əsas səbəbi yazdıqları sərt tənqidi yazılardır. 

Noyabrın 13-də Xətai Rayon Məhkəməsi S.Əlibəylini 4 il, Bakı Ağır Cinayətlər Məhkəməsi isə R. Ramazanovu 9 il müddətinə azadlıqdan məhrum edən hökm çıxarıb.

MHİ xatırladır ki, hökuməti, ayrı-ayrı məmurları tənqid edən yazılarına görə S.r Əlibəylini nəyin bahasına olursa olsun susdurmaq üçün zaman-zaman fərqli vasitələrdən istifadə olunub. Jurnalist 2005-ci ildən bu yana 11 dəfə məhkəməyə çəkilib, yazılarına görə dəfələrlə cinayət cəzası alıb, cərimə ödəməyə məhkum olunub. S.Əlibəyli son dəfə 2009-cu ildə böhtana görə 3 ay müddətinə azadlıqdan məhrum edilib, rəhbərlik etdiyi qəzetlərin fəaliyyətinə qanunsuz olaraq imkan verilməyib. Jurnalist dəfələrlə yazılarına görə ölümlə hədələnib. 

MHİ eyni zamanda yada salır ki, 9 il müddətinə azadlıqdan məhrum edilmiş R. Ramazanov hökumətə yönələn sərt şərhlər paylaşmasından dərhal sonra həbs olunub Bu, eləcə də blogerin 10 gündən artıq qanunsuz olaraq DİN BMCMİ-də saxlanılması, dindirmə zamanı təhqir edilməsi, zorakılığa məruz qalması barədə xəbərlərinin yayılması, əlaqəli qurumların bu xəbərləri şərh etməməsi R.Ramazanova qarşı ittihamların doğruluğuna ciddi şübhələr yaradıb.

Media Hüququ İnstitutu S. Əlibəyliyə və R.Ramazanova qarşı ittihamların əsassız olduğunu, hər iki iş üzrə məhkəmə prosesinin gedişinin onun çıxaracağı son qərarın doğruluğuna inamı öncədən sarsıtdığını vurğulayır. MHİ jurnalistə, bloqçuya qarşı ittihamların məhkəmə zamanı təsdiqini tapmadığını qeyd edir. MHİ sərt tənqidi ifadələrə çıxarılan hökmlərin əsas məqsədinin tənqidçi jurnalistlərin gözünü qorxutmaq, onları ictimai önəmli məsələləri, hökumətin önəmli siyasi fiqurlarının, məmurlarının fəaliyyətini araşdırmaqdan çəkindirmək və cəmiyyəti doğru bilgilər almaq hüququndan məhrum etmək olduğunu vurğulayır. 

MHİ Xətai Rayon  Məhkəməsinin, Bakı Ağır Cinayətlər Məhkəməsinin Sərdar Əlibəyli və Rəşad Ramazanovun barəsində çıxardıqları çox ağır, ədalətsiz hökmlərini pisləyir, həmin hökmlərin tez bir zamanda ləğv olunmasını tələb edir. .—06D—