Müdafiə Sənayesi Nazirliyi istehsalın həcmini artıb

Bakı/14.04.17/Turan: Müdafiə Sənayesi Nazirliyinin aprelin 14-də keçirilən kollegiya iclasında 2017-ci ilin birinci rübü üzrə nazirliyin birlik və müəssisələrinin istehsal, maliyyə-təsərrüfat fəaliyyətinin yekunları və qarşıda duran məsələlər müzakirə edilib. Bu barədə nazirliyin məlumatında bildirilib.

Qeyd olunub ki, hesabat dövründə nazirliyin müəssisələrində 2017-ci il üçün nəzərdə tutulan tədbirlərin icrası davam etdirilib, ölkənin güc strukturlarının sifarişləri əsasında bağlanmış müqavilələr üzrə müdafiə təyinatlı məmulatlar istehsal olunaraq sifarişçilərə təhvil verilib.

 Nazir Yavər Camalov deyib ki, müdafiə təyinatlı məhsulların istehsalının həcmi 2016-cı ilin müvafiq dövrü ilə müqayisədə 11,9% artıb və bu artım ixrac əməliyyatları hesabına təmin edilib. “İstehsal olunan məhsulların 87%-ni  müdafiə və xüsusi təyinatlı 13%-ni isə mülki təyinatlı məhsullar təşkil edir. İstehsalı mənimsənilmiş müdafiə təyinatlı məmulatların çeşid sayı 1200-ə çatdırılıb”, - nazir bildirib.

Onun sözlərinə görə, bu il nazirliyin müəssisələrində 136 adda müdafiə təyinatlı məhsulun yaradılması istiqamətində təcrübi-konstruktor işləri aparılır.

İclas zamanı “Tufan” minaya davamlı milli zirehli nəqliyyat vasitəsinin, “Yalquzaq” snayper tüfəngi və eyniadlı pulemyotun və s. hərbi təyinatlı məhsulların əhəmiyyəti barədə danışılıb.

İclasda “Zərbə” pilotsuz uçuş aparatının yeni növü olan “Zərbə-KH” (kumulyativ başlıqlı) pilotsuz uçuş aparatının yaradılması istiqamətində intensiv işlərə başlanıldığı vurğulanıb.-05D-