Müharibə əlili şikayət edir – nazirlik rəsmisi cavab verir

Bakı/23.02.21/Turan:  İkinci Qarabağ müharibəsi zamanı Füzulinin işğaldan azad olunması uğrunda gedən döyüşlərdə minaya düşərək bir ayağını itirmiş Murad Həsənova 3-cü qrup əlillik təyin edilib. 

M.Həsənov bu qərardan narazı olduğunu bildirib. O, Turana bildirib ki, həkim sənəddə onun haqqında «ağır yaralı» yazıb. «Neftçala Rayon Mərkəzi Xəstəxanasına əlilliyin təyin edilməsinə görə göndəriş yazılıb, Sosial Müdafiə Fonduna göndərilib. Bir həftə sonra telefonuma mesaj gəldi ki, III qrup əlil hesab olunuram. Mən bu qərarla razı deyiləm».

Sosial şəbəkələrdə müharibə zamanı ağır yaralı şəxslərə 3-cü qrup əlilliyin təyin edilməsində məqsəd büdcə xərclərini azaltmaqla bağlı olduğu deyilir.

Əmək və əhalinin sosial müdafiəsi Nazirliyinin mətbuat xidmətinin rəhbəri Fazil Talıbov Turana bildirib ki, ümumiyyətlə əlilliyin təyinatı sistemində köklü dəyişikliklərlə bağlı nazirlik tərəfindən hazırlanmış layihə artıq mövcuddur. «Bu layihə müvafiq qurumların təklifləri alınaraq aidiyyatı üzrə təqdim edilib. Bu, yeni qanunvericilik aktıdır».

Qurum rəsmisi qeyd edib ki, yeni qanunvericiliyə əsasən əlillik qruplar üzrə təyin edilməyəcək. «Hazırda əlillik 3 qrup üzrə təyin edilir. Yaxın gələcəkdə bu fiziki qabiliyyətin, hərəkət itirməsinin faizinə görə təyin ediləcək. Bu da beynəlxalq standartlara uyğundur».

F.Talıbov bildirib ki, dövlətin qazilərə yönələn çoxsaylı sosial dəstək tədbirləri var. «Müvafiq qurumları tərəfindən təyin edilən əlillik qrupları tam qanunauyğundur. Qrupların təyini meyarlara, göstəricilərə tam uyğundur. Ölkəmizin bütövlüyü uğrunda sağlamlığını qurban vermiş vətəndaşlara dövlət tərəfindən bütün sosial təminatı ilə əhatə olunur. Ümumi səbəblərdən əlilliyi olan şəxslər və müharibə əlilləri əlilliyə görə aylıq pensiya alır. Pensiya hüququ olmayanda isə əlilliyə görə aylıq müavinət alırlar. Bu müavinətin məbləği 2-ci dərəcəli əlilliyi olan şəxslər üçün 130 manat, 3-cü dərəcəli əlilliyi olanlar üçün isə 110 manatdır».

F.Talıblı vurğulayıb ki, müharibə əlilləri olan şəxslərə əlavə sosial ödənişlər verilir. «Onlara pensiya və ya müavinətdən əlavə Prezidentin aylıq təqaüdü də verilir. Bu təqaüdün məbləği 3-cü qrup müharibə əlilləri üçün 300 manat, 2-ci qrupda 350 manat, birinci qrupda isə 400 manatdır. Məsələn, 2-ci müharibə əlilin pensiyası 400 manatdırsa, ona Prezidentin təqaüdü ilə birlikdə aylıq 750 manat pul verilir».

Qurum rəsmisi əlavə edib ki, müharibə əlillərinə ümumi səbəbdən əlilliyi olan şəxslərlə müqayisədə dövlət tərəfindən mənzil verilir. «Həmçinin müharibə əlillər və tibbi göstərişləri varsa ümumi səbəbdən əlilliyi olan şəxslər dövlət tərəfindən avtomobillə təmin olunur. Bundan əlavə 1-ci və 2-ci dərəcəli əlilliyi olan şəxslər və sağlamlıq imkanları məhdud 18 yaşadək uşaqları ödənişli təhsil aldıqda təhsil haqları dövlət büdcəsinin hesabına ödənilir. Bu həmçinin müharibə əlillərinə də şamil edilir».

F.Talıblı vurğulayıb ki, müharibə əlillərinə dövlət qayğısı ildən ilə artır. O, yaralı şəxslərə 3-cü qrup əlilliyin təyin edilməsində məqsəd büdcə xərclərini azaltmaqla bağlı iddialarla qəti razı olmadığını bildirib. «Sosial dəstəklə bağlı kifayət qədər büdcə var. Bütün ayrılan pullar sosial tədbirlərə yönəlir. Postmüharibə dövründə təkcə 2838 şəhidimizin ailə üzvlərinə 12 mindən artıq sosial ödənişlər təyin edilib. Bura pensiya, müavinət və təqaüd aiddir. Erməni terroru nəticəsində həlak olmuş 83 mülki şəhidin ailələrinə 400-dən çox ödəniş təyin edilib. Yaralıların hər biri ilə görüşülüb. Onların sosial ehtiyacları öyrənilib. İndiyədək dövlət tərəfindən 9200-dək şəhid ailələsinə və müharibə əlillərinə mənzil və fərdi ev verilib. Təkcə bu il cənab Prezidentin tapşırığı ilə minlərlə vətəndaşlarımıza - həm şəhid ailələrinə, həm qazilərimizə Qaçqınlar və məcburi köçkünlərin işləri üzrə Dövlət Komitəsinin balansında olan mənzillər və fərdi evlər veriləcək. İndiyədək 7200-dən çox əlilliyi olan avtomobil verilib. Müharibədən sönra özünüməşğulluq proqramına 2200 şəhid ailəsi və müharibə iştirakçısı cəlb edilib. 9 min nəfər sosial-psixoloji dəstəklə təmin edilib. Sosial tərəfdaşlarla birgə ərzaq payları verilir. Azərsığorta tərəfindən şəhid ailələrinə 11 min manat məbləğində, həm xəsarət alan şəxslərə birdəfəlik sığorta ödənişlər edilib. Miqyas çox böyükdür və hər bir şəxs dövlət qayğısı ilə əhatə olunub».—21C-