Müxalifətçinin məhkəmə qərarı olmadan həbsdə saxlanma müddəti uzadılıb

Bakı/03.10.15/Turan: Azərbaycan Xalq Cəbhəsi Partiyası (AXCP) sədrinin müşaviri Məmməd İbrahim 48 saatdan çoxdur məhkəmə qərarı olmadan həbsdə saxlanılır ki, bu da, müdafiə tərəfin fikrincə, qanun pozuntusudur.

İbrahim sentyabrın 30-da Nərimanov rayon polis idarəsi tərəfindən 221.1-ci (xuliqanlıq) maddə üzrə şübhəli şəxs qismində saxlanılıb. Oktyabrın 1-də ona qarşı 1 ilə qədər azadlıqdan məhrumetmə nəzərdə tutan bu maddə ilə ittiham irəli sürülüb. Oktyabrın 2-də Nərimanov rayon polis idarəsi İbrahim barəsində həbs qətimkan tədbirinin seçilməsi haqqında təqdimatı Nərimanov rayon məhkəməsinə göndərib.

Vəkil Yalçın İmanovun Turan-a verdiyi məlumata görə, məhkəmə iclası 15.00 radələrində başlayıb, 40 dəqiqə sonra məhkəmə müşavirəyə çəkilib. “Amma maraqlı olan budur ki, müşavirə otağında hakim Məzahir Sadıqovla birlikdə Nərimanov rayon polis idarəsinin istintaq şöbəsinin rəisi Fəxrəddin Şirəliyev də var idi”, deyə vəkil bildirib.

Saat 21.00 radələrində vəkil məhkəmənin təqsirləndirilən şəxsə və müdafiəçisinə hörmətsizliyinə etiraz əlaməti olaraq məhkəmə zalını tərk edib. Yarım saat sonra məlum olub ki, iclas 3 oktyabr saat 15.00-a təxirə salınıb.

İmanovun fikrincə, “iclasın təxirə salınması üçün heç bir əsas yox idi”. Digər tərəfdən, oktyabrın 2-də saat 23.00-da İbrahimin məhkəmə qərarı olmadan həbsdə saxlanılması müddəti (48 saat) başa çatır. Bundan sonra İbrahimin həbsdə saxlanması qanunsuzdur, müdafiə tərəfi belə hesab edir. -06B-