Nardaranlılar vəd edilmiş işi və daşınmaz əmlak qəbalələrini gözləyirlər

Fevralın 3-də Əmək və Əhalinin Sosial Müdafiəsi Nazirliyi Nardaran qəsəbəsində əmək yarmarkası keçirib. Yarmarkada 200-dən çox iş yeri təklif olunub. Lakin hələlik heç kim işə qəbul olunmayıb.

Nardaran ağsaqqallarından biri Hacıağa Nuriyevin Turan-a verdiyi məlumata görə, yarmarka yerli sakinlərdə böyük maraq doğurub və kütləvi iştirak olub. Lakin hələlik heç kimi işə götürməyiblər. İşə götürənlər maraqlananlara əlaqə vasitələrini bildirməyi təklif ediblər və zəng etməyə söz veriblər.

Yarmarkada qoşqulu yük maşını sürücüləri və fəhlə ixtisasları üzrə vakansiyalar təklif olunub. Nardaranda sakitlik olmasına baxmayaraq, polis əvvəlki kimi giriş-çıxışa nəzarət edir.

İnzibati qaydada bütün həbs edilənlər artıq azad ediliblər. Bununla belə, təxminən 40-50 nəfərə cinayət ittihamı irəli sürülüb.

Amma onların böyük əksəriyyəti cinayət törətməyib və ağsaqqallar hüquq-mühafizə orqanlarının rəhbərlərinə məsələni araşdırmaq və təqsirsiz şəxsləri sərbəst buraxmaq xahişi ilə müraciət ediblər. Hələlik heç kim buraxılmayıb.

““Müsəlman Birliyi” hərəkatının nümayəndələrinin qaldığı bir evdə əməliyyat keçirilib. Bundan sonra heç bir qarşıdurma olmayıb”, deyə Nuriyev bildirib.

İndi qəsəbədə elektrik, qaz və su təchizatı ilə bağlı problem yoxdur. Amma əvvəlcədən ödənişli sayğaclar quraşdırıldığına görə imkansız ailələr çətinlik çəkir. Həmçinin, tikililəri və torpaq sahələri yolların genişləndirilməsi ilə əlaqədar söküntü planına düşən sakinlərə təzminat ödənilməsində problem var. Vətəndaşların bir hissəsi mənzilə görə kompensasiya alıb. Torpağa görə isə heç kim heç nə almayıb.

Nardaran sakinlərini daşınmaz əmlak üzərində mülkiyyəti hüququ haqqında sənədləri ala bilməmək narahat edir. Lakin son 50-60 ildə Nardaranda belə sənədlər verilməyib. Bir neçə dəfə Nardarana məmurlar gəlib, hansısa siyahılar tərtib edib, amma məsələ həll edilməyib.

“Mülkiyyət hüququ haqqında sənədlərin verilməsi məsələsinin həllində kömək etmək üçün administrasiyanın yüksək vəzifəli nümayəndələrindən birinin Nardarana gəlməsini xahiş edirik”, deyə Nuriyev bildirib. -06B-