Nazilrik: Ölkədə �donuz qripi� aşkar olunmayıb

Bakı/07.01.19/Turan: Azərbaycanda mövsüm ərzində "donuz qripi"nə yoluxma halları qeydə alınmayıb. Bu barədə Azərbaycan Səhiyyə Nazirliyindən bildirilib.

Nazirliyin məlumatına görə, sərhədyanı ölkələrdə gərgin epidemioloji vəziyyətin davam etməsi ölkə üçün real təhlükə kəsb etdiyinə görə, profilaktik, müalicəvi və əks-epidemik tədbirlərin həyata keçirilməsi tələb edilir.

Nazirlik bildirir ki, bununla bağlı yerlərdə lazım olan tədbirlər diqqətdə saxlanılır, sanitariya-gigiyena norma və qaydalarına, dezinfeksiya rejiminə ciddi riayət edilməsinə dair nəzarət gücləndirilib.

"Sərhəd keçid məntəqələri hərarəti olan xəstələri aşkarlamaq üçün termoindikatorlarla təchiz edilib. "Respublika Taun Əleyhinə Stansiyanın laboratoriyasına tibb müəssisələrindən kəskin respirator əlamətlərlə müşahidə edilən xəstələrdən 867 nümunə daxil olub, "donuz qripi" aşkar olunmayıb", deyə nazirlik bildirir.

Azərbaycanla həmsərhəd Gürcüstanda "donuz qrip"i yayılması və ölüm hallarının olması ilə bağlı məlumatlar yayılıb. -0-