Media-icmal 07.01.19

Neftçala Sənaye Məhəlləsinin inkişafı, özünüməşğulluq sahəsindəki problemlər, bu yaxınlarda keçirilmiş imtahanın nəticələrinə baxış, deputatın günün aktual məsələlərinə münasibəti və s. məsələlər bugünki (07 yanvar 2019-cu il) medianın aparıcı mövzularındandır...

Sənaye Məhəllələri strategiyası

"Azərbaycan" qəzeti "Bataqlıqlar üzərində tikilən modern sənaye kompleksi" sərlövhəli məqalədə Neftçala Sənaye Məhəlləsinin inkişafını dəyərləndirir.

Müəllif deyir ki, ölkədə aparılan islahatlar, dövlət proqramları, infrastruktur layihələrinin icrası, biznes və investisiya mühitinin yaxşılaşdırılması, özəl sektora dövlət dəstəyi və makroiqtisadi sabitlik güclü sənayenin formalaşdırılması üçün əlverişli şərait yaradıb.

"Prezident İlham Əliyevin son illərdə həyata keçirdiyi sənayeləşmə siyasəti nəticəsində yüzlərlə müasir müəssisə açılıb, yerli məhsulların istehsalı əhəmiyyətli dərəcədə artıb, ixracın həcmi çoxalıb", deyə bu fəaliyyətin nəticələrini vurğulayır.

Müəllifə görə, Prezidentin 2014-cü ildə "Sənaye məhəllələrinin yaradılması və fəaliyyətinin təşkili haqqında" fərmanına uyğun layihələr 2017-ci ildən reallığa dönüb, sənaye sektorunda yeni mərhələnin başlanğıcı olan ilk sənaye məhəlləsi - Neftçala Sənaye Məhəlləsi fəaliyyətə başlayıb.

Müəllif vurğulayır ki, sənaye məhəllələrinin yaradılmasında məqsəd bu sahədə kiçik və orta sahibkarlığı inkişaf etdirmək, istehsal və xidmət sahəsində əhalinin məşğulluğunu artırmaqdır.

Müəllif deyir ki, 2015-ci ilin fevralında Neftçalada ilk sənaye məhəlləsinin yaradılması üçün torpaq sahəsi ayrıldı və 2017-ci il sentyabrında dövlət başçısının iştirakı ilə məhəllənin açılış mərasimi oldu.

"Hazırda sənaye məhəlləsində aqrar sektor üçün mühüm əhəmiyyət kəsb edən pivot suvarma sistemləri, təkrar emaldan hazırlanan taralar, polietilen suvarma boruları, kağız stəkanlar istehsalı, modul tipli məktəb binalarının quraşdırılması, balıq, toyuq, xırda və iribuynuzlu mal-qara yemi, plastik məmulatlar, balıq emalı və konservləşdirilməsi ilə məşğul olan 9 müəssisə və 1 kiçik sahibkarlıq emalatxanası fəaliyyət göstərir. Sənaye məhəlləsinin iştirakçıları istehsal sahələrinin yaradılmasına 45,3 milyon manat investisiya yatırıblar, məhəllədə 500-ə yaxın iş yeri açılıb".

Müəllif deyir ki, sənaye məhəlləsinin fəaliyyəti həm rayon, həm də ölkə iqtisadiyyatına çox böyük təkan verir, 2018-ci ildə Masallı Sənaye Məhəlləsi fəaliyyətə başlayıb, 2019-cu ildə isə Hacıqabul Sənaye Məhəlləsinin açılışı gözlənilir, Sabirabad sənaye məhəlləsində isə tikinti-quruculuq işləri gedir.

Məqalənin sonunda isə oxuyuruq: "Bir sözlə, İlham Əliyevin vaxtilə verdiyi qərarlar artıq həyatda öz əksini tapır və ölkəmizdə modern sənayeləşmə istiqamətində aparılan siyasət uğurlu nəticələr verir".

İmtahanın yaratdığı suallar

"Moderator.az" saytında isə "İstedadlı şagird üçün istedadlı müəllim" müsabiqəsindən ortaya çıxan suallar..." sərlövhəli məqalə diqqət cəlb edir.

Sayt Təhsil Nazirliyinin bu yaxınlarda keçirdiyi "İstedadlı şagird üçün istedadlı müəllim" imtahanlarının nəticələrinə dair təhsil sahəsi üzrə ekspert Etibar Əliyevin dəyərləndirməsinə yer verib.

E.Əliyev deyir ki, müəllimlərin cəlb edildiyi imtahanın nəticələri ilə bağlı müzakirələr bir neçə səbəbdən anlaşılmaz mərhələyə keçdi: "Birincisi, keçirilmiş sınağın mahiyyəti haqda cəmiyyətə normal izah verilmədi, səthi yanaşıldı. İkincisi, müzakirə üçün bütün hallarda ağrılı nöqtələr var, müzakirələrə isə ya tənqidi qəbul etməyən, ya da pedaqoji işin mahiyyəti barədə dumanlı təsəvvürü olan adamlar qoşulur. O zaman aydın təsəvvürlər diqqətlə oxunmalıdır".

Adı çəkilən imtahanda müəllimlərin göstərdikəri zəif nəticələr ciddi tənqid hədəfi olmuşdu, nazirlik isə imtahanın əsas məqsədi kimi müəllimlərin istetdadlı şagirdləri üzə çıxararaq "olimpiada müəllimləri"nə yönləndrimək olması tezisini irəli sürmüşdü.

Ekspert də vurğulayır ki, "olimpiada müəllimləri"nin nəticələri o qədər də qənaətbəxş sayılmaz, çünki müsabiqəyə ən yaxşılar qatılıb.

E.Əliyev deyir ki, həm bu imtahan və həm də onun nəticələri kifayət qədər də suallar yaradıb: "Bu müəllimlərin çoxu dünənəcən şagird olub, məgər onların bir qismi belə olimpiada hərəkatından keçməyib? Dünya miqyasında olmasa da, yerli uğurlara sahib olmayıblar, şəhər, rayon turlarını keçməyiblər? Universitetdə oxuyanda fənni daha yaxşı öyrənməyiblər? İllərdir dərslərində çətinliyi artırılmış məsələ və suallarla məşğul olmayıblar? Dərnəklər, yarışlar təşkil etməyiblər? Pedaqoji nəzarət olunmayıb bu işlərə?"

E.Əliyevin sualları bununla bitmir, məktəb yarışları barədə metodik ədəbiyyat və vəsaitlərin, olimpiada kontentinə keçid olan çətinliyi artırılmış məsələ və suallar üzrə vəsaitlərin, olimpiada vəsaitlərinin çox az olması kimi suallar da bura əlavə edilir.

Ekspert vurğulayır ki, Türkiyədə istedadlı uşaqlarla işləyən "BilSem" mərkəzləri kimi şəbəkələr fəaliyyət göstərir, Azərbaycanda isə belə bir şəbəkə yoxdur.

E.Əliyev deyir ki, digər tərəfdən azərbaycanlı alimin rəhbərlik etdiyi Türkiyə komandası dünyanın ən uğurluları sırasına çıxır, biz isə bunu edə bilmirik.

Ekspert həm də bu tənqidi ancaq tənqid xatirinə etmədiyini söyləyir: "Biz istəyib deyirik bunları. Bizim qabağımıza problem barədə aydın təsəvvürləri olmayanları çıxarmaq nəyi həll edir ki? Son illər bu sahədə yaxşı işlər də görülüb. Amma problemlər də qalıb, özü də necə".

Naməlum şirkətlər və özünüməşğulluq proqramı

"Azadlıq.info"da isə "Özünüməşğulluq proqramında da fırıldaqlar bitmir" sərlövhəli məqalə oxumaq olar.

Sayt özünüməşğulluq sahəsindəki problemlərə dair iqtisadçı alim Qubad İbadoğlunun düşüncələrinə yer verib.

Q.İbadoğlunun sözlərinə görə, şikəst, xəstə, qısır heyvanları ailə təsərrüfatlarına "sırıyan" şirkətlər haqqında maraqlı məlumatlar üzə çıxır.

"30,3 milyon manatlıq layihə icraçılarının hətta internetdə səhifələri də yoxdur.

19,2 milyon manatlıq layihə icraçısı olan şirkətlər isə fəaliyyətə başlamamışdan bir neçə ay əvvəl yaradılıb. 2018-ci ildə özünüməşğulluq proqramının icrasına büdcədən 35,6 milyon manat ayrılıb. Bu vəsaitin 30,3 milyon manatı 3 müqavilə üzrə 4 MMC arasında bölüşdürülüb.

İqtisadçı alim vurğulayır ki, iş, xidmətlər və istehsalat mallarının təqdim olunmasına görə "Az Nest" MMC və "SRS Consulting" şirkəti konsorsiumuna 9 milyon 894 min 357,82 manat, kənd təsərrüfatı malları ilə təminata görə "Aqri Kon" MMC və "Bis Co" MMC konsorsiumuna 19 milyon 225 min 246 manat vəsait ayrılıb.

Q.İbadoğlu dövlət satınalmaları registrində açıqlanmış məlumatlara istinadən deyir ki, nazirliyin Dövlət Məşğulluq Xidməti özünəməşğulluq tədbirlərinin icrası üçün satınalma müsabiqəsi keçirilmədən "Az Nest" MMC və "Aqri Kon" MMC ilə müqavilələr bağlayıb.

Alim iddia edir ki, adı çəkilən hər iki şirkət müqavilənin imzalanmasından 1-2 ay əvvəl yaradılı, hazırda şikəst, xəstə, qısır heyvanları ailə təsərrüfatlarına "sırımaqda" ittiham olunur.

Onun sözlərinə görə, digər iki şirkət - "Az Nest" MMC və "SRS Consulting" şirkəti isə 2017-18-ci illərdə İqtisadiyyat Nazirliyinin elan etdiyi açıq tenderlərin qalibi olub.

Q.İbadoğlu iddia edir ki, İqtisadiyyat Nazirliyindən sonra Əmək və Əhalinin Sosial Müdafiəsi Nazirliyinin 30 milyon manatlıq sifarişlərini icra edən şirkətlərin heç birinin internet saytı belə yoxdur, yalnız "SRS Consulting" şirkətinin ingilis dilli saytında yalnız ABŞ və Hindistan ofisinin əlaqə məlumatları yerləşdirib.

"Görün, büdcədən ayrılan vəsaitlər hesabına maliyyələşən 10 milyonlarla dövlət sifarişlərini hansı şirkətlər icra edir. Şübhəsiz ki, bu şirkətlərlə belə işləri sövdələşmə əsasında reallaşdırırlar", deyə ailm iddiasını ortaya qoyur.

Deputat: Bunun bir adı var...

"Yeni Müsavat" qəzetində isə "Fazil Mustafa: Bunun bir adı var - vəhşilik" sərlövhəli məqalə diqqət çəkir.

Müəllif günün vacib məsələlərilə bağlı deputat Fazil Mustafa ilə söhbətləşir.

Deputat ilkin olaraq parlament iclaslarının gedişində deputatların potensiallarını tam ortaya qoy bilməsi məsələsinə toxunur və mövcud potensialın çox az hissəsini ortaya qoya bildiklərini deyir: "Bu, ilk növbədə Konstitusiyanın parlament funksiyasını məhdudlaşdıran normalarından irəli gələn bir durumdur. Siyasi alternativlik imkanlarının xeyli məhdud olması, faktiki olaraq müxalifətə fraksiya yaratmaq imkanının verilməməsi, qanunvericilik təşəbbüsü hüququnun dolayı yolla deputatların əlindən alınması bu fəallığın hüdudlarını xeyli daraldır".

Deputat hesab edir ki, sağlam müzakirə ortamı yoxdur, ona görə də bilik və təcrübələri daha səmərəli şəkildə ortaya qoymaq mümkün olmur.

Turizm sahəsində problemlərə gəlincə, deputat deyir ki, rayonlarda turizm üçün yeni infrastrukturlar yaradılsa da, qiymətlərin bahalığı və xidmətin aşağı səviyyədə olması problem olaraq qalır: "Bu səbəbdən turistlərin əhəmiyyətli hissəsi qonşu ölkələri tərcih edirlər".

Bakıda tıxacların, yağış-qar sularının problem yaratmasını deputat paytaxatın "məmur məsuliyyətsizliyi"nin qurbanına çevrilməsi kimi dəyərləndirir.

F.Mustafaya görə, bununla bağlı bir məmurun belə narahatlıq keçirdiyini hiss etmək olmur.

Deputat vurğulayır ki, sədri olduğu "Böyük Quruluş" Partiyası Bakı Böyük Şəhər Bələdiyyəsinin, Bakı merinin seçilməsini dəfələrlə Milli Məclisdə səsləndirib, lakin çoxluq tərəfindən dəstək görməyib, bunun səbəbini tapa bilmədiyini deyir.

Deputat Bakıda yaşıllıqların qırılmasını vəhşilik adlandırır və bunun nəticələri barədə bildirir: "Yaşıllıqların məhvinə, qida təhlükəsizliyinə biganə qalmağın nəticəsidir ki, son bir ildə onkoloji xəstəliklərin sayı böyük sürətlə, yəni 3 dəfə artıb!"