Keçmiş diplomat 3-cü gündür ki, istintaq təcridxanasında aclıq edir

Keçmiş diplomat Emin İbrahimov 3-cü gündür ki, Şüvəlan İstintaq Təcridxanasında aclıq edir. O, əsassız həbs olunmasına etiraz edir.

İyulun 26-da vəkil Aqil Layıc İbrahimova baş çəkdikdən sonra Turan-a bildirib ki, İbrahimov solğun görünüb, vəziyyəti pisləşib, onda başağrısı yaranıb. Buna baxmayaraq, azadlığa çıxana qədər aclıq etmək niyyətindədir.

Vəkilin sözlərinə görə,  müttəhimə heç bir tibbi yardım göstərilmir.

İbrahimov 4-5 nəfər üçün nəzərdə tutulmuş kamerada saxlanılır, lakin orada 10 məhbus var, hətta yatmaq üçün şərait yoxdur.

Vəkil həbsdən apellyasiya şikayəti verib.

İbrahimov iyulun 22-də saxlanılıb. İki gün sonra Cinayət Məcəlləsinin 126.2.4 (xuliqanlıq niyyətilə sağlamlığa ciddi ziyan vurmaq) və 221.1 (xuliqanlıq) maddələrilə ittiham olunub.

Vəkilin sözlərinə görə, polis bildirir ki, İbrahimov Qaraçuxur qəsəbəsinin sakini Kamal Şükürovu bıçaqlayıb.

Lakin İbrahimovun sözlərinə görə, metronun "Xalqlar dostluq" stansiyasının yaxınlığında naməlum şəxs ona hücum edib və paltarını cırmağa başlayıb. Saniyələr sonra mülki geyimli polislər gələrək İbrahimovu saxlayıblar.

O, vəkilə deyib ki, həmin şəxsi hadisə yerinə "təcili yardım" maşını ilə gətiriblər.

İyulun 24-də Nizami Rayon Məhkəməsi İbrahimovu 4 ay müddətinə həbs edib.

* 2005-ci ildə Emin İbrahimov Ankara Universitetində beynəlxalq münasibətlər ixtisası üzrə magistr dərəcəsini alıb. 2009-cu ildə NATO Müdafiə Kollecinin Ali Kursunu bitirib.

2007- 2020-ci illərdə diplomatik xidmətdə olub.

2012-2016-cı illərdə Azərbaycanın ABŞ-dakı səfirliyinin ikinci katibi, 2016-2020-ci illərdə Uruqvayda müvəqqəti işlər vəkili olub.

2020-ci il parlament seçkilərinin saxtalaşdırılmasına etiraz olaraq diplomatik xidmətdən istefa verib. Bundan sonra analitik işlərlə məşğul olub, KİV və sosial şəbəkələrdə şərhlərlə çıxış edib.

O, Qərblə münasibətlərin pisləşməsinə, Rusiya və digər avtoritar dövlətlərlə yaxınlaşmasına görə hakimiyyəti kəskin tənqid edib.

2023-cü ilin sentyabrında Emin İbrahimov “Rusiyanın əlinə oynayan siyasət” adlı məqalənin dərcinə görə inzibati qaydada 30 sutka həbs edilib.