Məhkəmə İlhamiz Quliyevi ev dustaqlığına buraxmaqdan imtina edib

İyulun 25-də Bakı Ağır Cinayətlər Məhkəməsində narkotik ittihamı ilə həbs edilən fəal İlhamiz Quliyevin cinayət işi üzrə məhkəmə prosesi davam etdirilib.

İclasın əvvəlində vəkil Zibeydə Sadıqova R.Quliyevin barəsində seçilmiş həbs-qətimkan tədbirinin ev dustaqlığı ilə dəyişdirilməsi barədə vəsatət qaldırıb. Vəkilin sözlərinə görə, İ.Quliyev hətta ventilyator belə olmayan isti kamerada saxlanılır ki, bu da işgəncə kimi qiymətləndirilir.

Lakin vəsatət təmin edilməyib.

Bundan başqa, vəkil sözlərinə davam edib, ibtidai istintaq artıq yekunlaşdığından Quliyevin həbsdə saxlanması üçün heç bir əsas yoxdur.

Daha sonra prosesdə şahid, Yasamal rayon 28-ci polis bölməsinin əməkdaşı Polad Mustafayev dindirilib. Onun sözlərinə görə, Quliyev 2023-cü il dekabrın 4-də narkotik vasitələrin saxlanması və satışı ilə bağlı daxil olmuş əməliyyat məlumatı əsasında saxlanılıb. Şöbədə şəxsi axtarış zamanı İ.Quliyevin üzərindən bükümdə narkotik vasitə aşkar edilib.

Şahid daha sonra bildirib ki, İ.Quliyev narkotik vasitələrin ona məxsus olmadığını, xəlvəti qoyulduğunu deyib.

Quliyevin polisdə fiziki təzyiq göstərməsi ilə bağlı iddialarına cavab olaraq Mustafayev bildirib ki, həbs zamanı fəal yumruqları ilə özünün sinə və başına döyməyə başlayıb.

Buna İlhamiz Quliyev cavab olaraq bildirib ki, Ş.Mustafayev həbs zamanı ümumiyyətlə olmayıb və o, yalnız şəxsi axtarış zamanı şöbədə olub.

*Xatırladaq ki, Quliyev 2023-cü il dekabrın 4-də saxlanılıb, 6-da isə külli miqdarda narkotik vasitələrin qanunsuz dövriyyəsi ittihamı ilə 4 ay müddətinə həbs edilib.

Lakin Quliyevin həbsinin əsl səbəbi odur ki, “Abzas Media”ya müsahibəsində polisin qanunsuz əməllərindən və cinayət işlərinin saxtalaşdırılmasından danışıb.