Azərbaycan pasportu qlobal mobillik indeksində 69-cu yerə yüksəlib

Azərbaycan pasportu 2024-cü ilin birinci yarısı üçün Henley& Partners pasport indeksində 69-cü yerə yüksəlməklə nəzərəçarpacaq dərəcədə yaxşılaşıb. Pasport sahiblərinə təqdim olunan vizasız istiqamətlərin hesablanması yoluyla qlobal mobilliyi qiymətləndirən bu indeks beynəlxalq səyahətlər azadlığı sahəsində Azərbaycanın irəlilyişini önə çəkir.

Henley& Partners indeksi Beynəlxalq Hava Nəqliyyatı Assosiasiyasının (IATA) təqdim etdiyi məlumatlardan istifadə edərək 199 ölkənin pasportlarını qiymətləndirir. Azərbaycan pasportunun irəliləməsi yanvarda 76-cı yerdən əhəmiyyətli bir sıçrayışdır və son altı ayda yeddi pillə yüksəldiyini əks etdirir.

Hazırda Azərbaycan pasportunun sahibləri 71 ölkəyə vizasız səfər edə bilərlər ki, bu da öz vətəndaşları üçün səyahət çevikliyini artırır. Bu inkişaf Cənubi Qafqazda daha geniş regional tendensiyalara uyğundur. Müqayisə üçün qeyd edək ki, Gürcüstan pasportu indeksdə 44-cü yerdədir və 122 istiqamətə vizasız giriş təklif edir.  Ermənistan isə 72-ci yerdədir, onun pasportu  68 ölkəyə vizasız giriş imkanı verir. İndeksə əvvəlkitək Sinqapur liderlik edir. Onun pasportu 195 ölkəyə vizasız getmək hüququ verir. Əfqanıstan pasportu isə əksinə, reytinqin ən aşağı hissəsindədir, bu pasportun sahibləri yalnız 26 ölkəyə  vizasız gedə bilər.

Reytinqlərdə belə dəyişiklik qlobal mobillik sahəsində dəyişən vəziyyəti ortaya qoyur, müxtəlif ölkələr apardıqları diplomatik və siyasi düzəlişlərə görə öz beynəlxalq imkanlarında dəyişikliklərlə qarşılaşırlar.