NİDA fəalları beş gündür ki, aclıq edirlər

NİDA hərəkatının həbs edilmiş 8 fəalı 5 gündür ki, Kürdəxanı istintaq təcridxanasında aclıq aksiyası keçirirlər. Eyni zamanda, təqsirləndirilən şəxslərin valideynləri Müsavat Partiyasının qərargah-mənzilində aclıq aksiyası keçirirlər.

Gənclər də, valideynləri də prokurorun gənclərə 6,5 ildən 8,5 ilədək azadlıqdan məhrumetmə cəzası istəməsinə etiraz edirlər.

Müsavat Partiyasının qərargah-mənzilində Zaur Qurbanlı, Rəşadət Axundov və Şahin Novruzlunun anaları – Səkinə Qurbanova, Mətanət Axundova və Mehparə Novruzova aclıq aksiyası keçirirlər.

Qurbanova bildirib ki, o, bu gün oğlu ilə danışıb. “Onlar bizi sakitləşdirmək üçün özlərini yaxşı hiss etdiklərini deyirlər. Amma biz bilirik ki, onların səhhətlərində problemlər yaranıb. İstintaq təcridxanasının rəhbərliyi isə aclıq aksiyasını dayandırmaları üçün onlara təzyiq göstərir”, deyə Qurbanlı bazar ertəsi keçirilən mətbuat konfransında bildirib.

Bəzi təqsirləndirilənlərin valideynləri Bakıda yaşamadıqları üçün aclıq aksiyasında iştirak etmirlər.

Aksiya iştirakçıları təqsirləndirilən şəxslər azad edilənə qədər aclığı davam etdirmək niyyətindədirlər.

Qeyd edək ki, gənclərin işi üzrə məhkəmə başa çatmaq üzrədir, çərşənbə axşamı vəkillərin çıxışları gözlənilir.

* Gənclər əsgər ölümlərinə qarşı 10 mart 2013-cü il etiraz aksiyasında kütləvi iğtişaşların təşkilində ittiham olunurlar. Bütün təqsirləndirilən şəxslər Amnesty İnternational tərəfindən “vicdan məhbusu” kimi tanınıb. -16C06-