Ölkə universitetlərinə tələbə qəbulunda böyük kəsir

Bakı/16.08.18/Turan: Dövlət İmtahan Mərkəzi (DİM) 2018-2019-cu tədris ili üçün ali təhsil müəssisələrinə ixtisas seçimi müsabiqəsinin nəticələrini elan edib. Mətbuat konfransında DİM-in Direktorlar Şurasının sədri Məleykə Abbaszadənin verdiyi məlumata görə, bu il qəbul imtahanlarında maksimum 700 balı rekord sayda abituriyent yığıb. 29 nəfər belə yüksək nəticə göstərib.

Onun sözlərinə görə, əvvəlki onillər ərzində abituriyentlərin biliklərinin sınanması sisteminin təkmilləşdirilməsi üzrə böyük dəyişikliklər baş verib. Dəyişikliklər qəbul imtahanlarının formasına və mahiyyətinə aid olub, abituriyentlərin biliklərinin obyektiv və şəffaf şəkildə qiymətləndirilməsinə şərait yaradıb.

2017-ci ildən etibarən abituriyentlərə iki dəfə - yazda və yayda seçilmiş konkret qrup üzrə imtahanlarda iştirak etməyə icazə verilib. Amma bu il onlara müxtəlif ixtisas qrupları üzrə imtahanlarda iştirak etmək imkanı da verilib, bu da gənclərin öz nəticələrini yaxşılaşdırmasına, ixtisas seçimi müsabiqəsində daha böyük əminliklə iştirak etməsinə imkan verir. Bütün bu dəyişikliklər imtahanların nəticələrinə müsbət təsir göstərib.

Bununla belə, DİM-in statistikasından göründüyü kimi, ölkə universitetlərinə tələbə qəbulunda böyük kəsir var. Qəbul imtahanlarında ümumilikdə I-V ixtisas qrupları üzrə 74 min oğlan və qız iştirak edib, onların 44772-si ixtisas seçimi mərhələsinə keçib. Müsabiqə seçimindən 39906 abituriyent keçərək universitetlərdə təhsil almaq hüququ əldə edib. Onların 11963 nəfəri dövlət sifarişi üzrə yerlərə, 27943-ü ödənişli yerlərə qəbul olunub.

Ali məktəblərə qəbul planı cəmi 88,3% yerinə yetirilib. Əvvəlki illərdə bu rəqəmin 90%-dən yuxarı olduğunu nəzərə alsaq, kifayət qədər aşağı göstəricidir. Ölkənin ali təhsil müəssisələrində ayrılmış 45159 plan yerindən 5000-dən çox boş qalıb. Bunlar əsasən ödənişli yerlərə və regional ali məktəblərə aiddir. Bu zaman, əvvəlki illərin təcrübəsindən göründüyü kimi, yüksək təhsil haqqı ilə əlaqədar aztəminatlı tələbələrin ali məktəblərdə təhsildən imtina etməsi faktını da nəzərə almaq lazımdır. Məsələn, ötən il Azərbaycan Tibb Universitetində "Müalicə" ixtisası üzrə təhsil haqqı 3500 manatdan 4500 manata qədər artırılıb. "ADA" universitetinin bakalavr pilləsində bir illik təhsil haqqı artıq 6500 manat təşkil edir. Orta statistik Azərbaycan ailəsi üçün bu, ödənilməsi mümkün olmayan məbləğdir. Paytaxtın digər ali məktəbləri də yeni təhsil haqqı tarifləri müəyyən ediblər.

Amma, əsas mövzuya qayıdaq. DİM ölkənin ali məktəblərində boş qalan yerlərə əlavə yerləşdirmə elan edib. Bu proses avqustun 16-dan 21-nə qədər davam edəcək. İxtisas qrupları üzrə boş yerlərin sayı haqqında məlumat "Abituriyent" jurnalının 8-ci sayında dərc ediləcək.

Qaydalara əsasən, avqustun 16-dan 28-nə qədər abituriyentlər daxil olduqları ali məktəblərə sənədlərini təqdim edərək, qeydiyyatdan keçməlidirlər (şənbə, bazar və bayram günləri istisna olmaqla). Tələb olunan sənədlərin siyahısını həmin ali məktəblərdən öyrənmək olar. -0-