Operatorlar səhv edə bilər, amma bizim benzinimiz ən yaxşı benzinlərdəndir - "Lukoyl-Azərbaycan"

Azərbaycan Azad İstehlakçılar Birliyinə vətəndaş Nuranə Göktaşdan şikayət daxil olub. O, Bakı şəhəri, Xətai rayonu, R.Quliyev küçəsi, 6 ünvanında Lukoyl-Azərbaycan şirkətinin yanacaqdoldurma stansiyasında aldadıldığını bildirib. AAİB şikayəti İqtisadiyyat Nazirliyinə, Vergilər Nazirliyinə və Standartlaşdırma, Metrologiya və Patent üzrə Dövlət Komitəsinə göndərib.

N.Göktaş iddia edir ki, yanacaqdoldurma məntəqəsində sürücüsünün idarə etdiyi KİA-Sportage avtomobilinin benzin çənini tamamilə dolduraraq, 56 manat alıblar, bir halda ki, çəndə hələ bir qədər benzin var idi (maşın özü gəlmişdi), boş çəni doldurduqda isə o, həmişə 49,50 manat ödəyir. Sürücü artıq qalan pulu tələb edib, işçi pulu qaytarmaqdan imtina edib, növbəti gün, martın 20-də isə şirkətin məsul işçisi Bahadur Hüseynov Nuranə Göktaşın tələbini təmin etməyib.

Turan İnformasiya Agentliyi bu şikayətlə maraqlandı, belə ki, azərbaycanlı avtomobil sahibləri arasında yanacaqdoldurma məntəqələrində hiylələrin yayıldığı haqqında fikir hökm sürür. Bu mövzuda çox sayda məqalə dərc olunub. Müəlliflər iddia edirlər ki, sürücüləri həm miqdarda, həm də satılan yanacağın keyfiyyətində aldadırlar. İnternet-forumlarda isə sürücülər aldadılmaq istəməyənlərin hansı yanacaqdoldurma məntəqələrindən yanacaq ala biləcəyi barədə məlumat mübadiləsi aparırlar.

http://www.turan.az/ext/news/2017/5/free/Social/ru/62663.htm

Disput.az forumunda "Lukoyl yanacaqdoldurma məntəqəsində hiylə!" başlıqlı müzakirə məşhurdur.

https://www.disput.az/index.php?app=forums&module=forums&controller=topic&id=370193&page=4

Forumda bu şirkət haqqında çox sayda mənfi rəy var, rəylərin altında aldadılma faktları haqqında göstərilən nömrəyə məlumat verməyi təklif edən "Lukoyl" əməkdaşlarının cavabları yerləşdirilib. Forumdakı bütün məlumatlar 2012-ci il tarixlidir.

Turan N.Göktaşın görüşdüyü "Lukoyl-Azərbaycan"ın regional meneceri Bahadur Hüseynova zəng edib. Hüseynov izah edib ki, o, bu vətəndaşın müraciətindən sonra internetde KİA-Sportage avtomobilinin texniki xüsusiyyətlərini araşdırıb və müəyyən edib ki, buraxılış ilindən asılı olaraq, maşınlarda benzin çəninin həcmi fərqlidir: 58, 60, 62 litr. Göktaşa məxsus olan avtomobil 2015-ci ildə istehsal edilib, deməli, 58 və ya 62 litrlik çənlə təchiz edilib. KİA-Servis təmir emalatxanasında da belə dedilər.

Hüseynov Nuranə Göktaşa servisə gəlməyi, maşınının benzin çəninin həcmini dəqiq bilmək üçün benzini boşaldıb, şirkətin hesabına benzin çənini yenidən doldurmağı təklif edib. Amma Göktaş imtina edib, vaxtı olmadığını, uzaq yol gedəcəyini bildirib. Bir daha təqsirkarları müəyyən edib cəzalandırmağı tələb edib. "Lukoyl-Azərbaycan" şikayətçinin iştirakı ilə araşdırma aparmaqdan imtina etmir və onun gəlməsini gözləyir, deyə B.Hüseynov bildirib.

Fürsətdən istifadə edərək, biz B.Hüseynova avtomobil ictimaiyyətini maraqlandıran iki sual verdik: yanacaqdoldurma məntəqələrində hiylə (təkcə "Lukoyl"un deyil) və Azərbaycanda satılan avtomobil yanacağının keyfiyyəti haqqında.

Regional menecer Hüseynov etiraf edib ki, operatorların (yanacaqdolduranların) işində səhvlər olur. Şirkət vətəndaşların şikayətləri əsasında araşdırma aparır və təqsirkarları cəzalandırır, bəzən işdən belə çıxarır.

"Səhv hər yerdə və hər zaman ola bilər. Vətəndaşlar aldadılmamaq üçün bazarlarda satıcının məhsulları necə çəkdiyini diqqətlə izləyir. Bizim alıcılarımızın da avtomobilə yanacaq doldurarkən yanacaqdoldurma avtomatının göstəricilərini müşahidə etməsini doğru hesab edirəm. Şübhə olduğu halda iradla bizə müraciət edə bilərlər, biz bu iradları araşdıracağıq", deyə Hüseynov bildirib.

O, Azərbaycanda satılan avtomobil yanacağının oktan sayının qəsdən dəyişdirilməsi ehtimalını istisna edib, bazadan yüksək keyfiyyətli məhsul aldıqlarını bildirib. Bundan başqa, "Lukoyl" bazasında Aİ-92 benzininə və dizel yağına yanacağın keyfiyyətini yaxşılaşdıran və avtomobilin çənini təmizləyən EKTO aşqarı əlavə edilir, deyə B.Hüseynov qeyd edib.

"Lukoyl"un rəsmi saytında "son nəsil çoxfunksiyalı yanacaq aşqarları paketi əlavə edilməklə" EKTO markalı benzin satan bu şirkətin novasiyası haqqında məlumat var. -0-