Oqtay Əsədov: Ermənistan beynəlxalq təşkilatların qətnamələrinə məhəl qoymur

Bakı/16.10.17/Turan: "Ötən 25 il ərzində Ermənistan mötəbər beynəlxalq təşkilatların qərar və qətnamələrinə məhəl qoymur və beynəlxalq hüquq qaydalarını kobudcasına pozmaqda davam edir. Təcavüzkarı beynəlxalq təşkilatların qərarlarına əməl etməyə məcbur edən mexanizm mövcud deyil. Bu isə Dağlıq Qarabağ münaqişəsinə ikili standartlar əsasında yanaşılmasına gətirib çıxarır".

Milli Məclisin sədri Oqtay Əsədov Parlamentlərarası İttifaqın 137-ci Assambleyasındakı çıxışında belə deyib. Bu haqda parlamentin mətbuat xidmətinin bu gün, oktyabrın 16-da yaydığı məlumatda deyilir.

O.Əsədov Azərbaycan ərazisinin bir hissəsini işğal altında tutulması barədə danışıb.

"Hesab edirik ki, özgə torpaqlarının qəsb edilməsinə göz yumulmasının bütün dünyada sülh və təhlükəsizlik üçün nə dərəcədə qorxulu olduğu hamılıqla qəbul edilməlidir. Beynəlxalq birlik özündə güc tapıb qəti tədbirlər görməli və bütün münaqişələr, o cümlədən Dağlıq Qarabağ münaqişəsi hamılıqla tanınmış beynəlxalq hüquq prinsipləri və normaları əsasında həll edilməlidir".

Oqtay Əsədov çıxışında Azərbaycanın multikulturalizm və tolerantlıq modeli olmasından da bəhs edib. O, qeyd edib ki, Azərbaycan dünyaya demokratik cəmiyyət nümunəsi təqdim edir. Bu nümunə etnik mənsubiyyətindən və dini etiqadından asılı olmayaraq hər kəsin hüquq və azadlıqlarının müdafiəsinə təminat verilməsinə, ölkədə yaşayan xalqların mədəni sərvətlərinin qorunmasına və inkişafına əsaslanır.

Parlamentlərarası İttifaq (PAİ) müstəqil dövlətlərin parlamentlərinin ümumdünya təşkilatıdır. Əsası 1889-cu ildə qoyulan qurumun qərargahı Cenevrə şəhərində yerləşir.

Azərbaycan Parlamentlərarası İttifaqa 1993-cü il aprel ayında üzv qəbul olunub.

Milli Məclis PAİ-də 9 deputatından ibarət nümayəndə heyəti ilə təmsil olunur.