Ordu üçün ərzaq təchizati niyə dövlət sirri olmalıdır?

Bak/24.12.20/Turan: Müdafiə nazirinin əmri ilə qısa müddət ərzində mütəxəssislərdən ibarət bir neçə komissiya hərbi birliklərdə şəxsi heyətin yerləşməsi və məişət şəraitinin yoxlanılmasını həyata keçirib.

Bu barədə dekabrın 23-də Müdafiə Nazirliyi məlumat yayaraq bildirib ki, kompleks yoxlamalar nəticəsində ümumilikdə təminat məsələlərində sistemli problemlər aşkar edilməyib. «Bununla belə bəzi cüzi nöqsanlar müəyyən edilib və aşkar olunan bu çatışmazlıqlar dərhal aradan qaldırılıb. Vəzifələrinin icrasına səhlənkar yanaşan, nöqsanlara yol verən bəzi vəzifəli şəxslər cəzalandırılıb və onlar barəsində müvafiq tədbirlər görülüb».

Qurumun sosial şəbəkələrdə yayılan işğaldan azad olunmuş ərazilərdə xidmət edən hərbi qulluqçuların ərzaq çatışmazlıqdan və şəraitsizlikdən əziyyət çəkdiyini iddialardan sonra bu açıqlamanı yaydı.

Açıqlamada nazirlik qeyd edir ki, «son günlər sosial şəbəkələrdə Azərbaycan Ordusunun nüfuzuna xələl gətirən və Vətən müharibəsində əldə etdiyimiz zəfərə kölgə salan video kadrlar yayılır və onlara məqsədyönlü şəkildə müxtəlif qərəzli şərhlər yazılır. Beləliklə də “Dövlət sirri haqqında” Azərbaycan Respublikasının Qanununun müvafiq tələbləri pozularaq Ordumuz barəsində məlumatlar yayılır, qeyri-obyektiv xəbərlərlə isə hərbi qulluqçularımızın nüfuzuna xələl gətirilir».

Qurum vurğulayıb ki, hazırda Azərbaycan Ordusu 30 ilə yaxın müddətdə işğal altında olan, tam dağıdılmış, viran edilmiş, heç bir infrastrukturun olmadığı və minalanmış ərazilərdə, yeni yerlərdə dislokasiya olunur. «Digər dövlət qurumları ilə bərabər Müdafiə Nazirliyinin rəhbərliyi də bu ərazilərdə yerləşdirilən hərbi hissələrin məişət şəraitinin yaxşılaşdırılması istiqamətində planlı və məqsədyönlü fəaliyyət göstərir… Hərbi hissələrə, mövqe və postlara yeni yollar çəkilir, elektrik, su və qaz xətləri quraşdırılır».

Nazirlik xüsusi qeyd edib ki, hərbi qulluqçular ərzaq və əşya təminatı normalarına uyğun bütün təminat növləri ilə fasiləsiz təmin olunur. «Çöl şəraitində yerləşən bölmələrə əlavə çadırlar, sobalar və digər zəruri avadanlıqlar çatdırılır. Müxtəlif istiqamətlərdə səyyar mobil hamam-camaşırxana xidmətləri təşkil olunur, hərbi qulluqçular isti geyim formaları, yataq dəstləri, keyfiyyətli ərzaqla təmin edilir. Dağlıq ərazidəki hərbi hissələrin şəxsi heyəti normalara uyğun olaraq yüksək kalorili əlavə ərzaq payı ilə təmin olunur. Bununla yanaşı anbarlarda kifayət qədər ehtiyatlar da mövcuddur».

Xəzər Hərbi Tədqiqatlar İnstitutunun rəhbəri Cəsur Sumərinli AzadlıqRadiosuna bildirib ki, işğaldan azad olunmuş ərazilərdə şəraitsizlik var və bunu nəzərə almaq lazımdır. «Yeni hərbi hissələrin yaradılması prosesi gedir. Artıq Azərbaycan Silahlı Qüvvələrinin və digər hərbi qurumların nəzarətinə verilmiş ərazilər əvvəlkindən genişdir və bu baxımından həmin ərazilərdə hərbi infrastrukturun qurulması da zaman alır».

Hərbi ekspert qeyd edib ki, ərzaqla və tibbi təminatı ilə bağlı problemlər çox ciddi problemlərdir. «Bunların ortaya çıxması yolverilməzdir. Müdafiə Nazirliyinin təminata görə cavabdeh olan qurumları var və onların birbaşa vəzifəsi silahlı qüvvələrin olduğu yerlərdə onların ərzaqla, tibbi, qalma şəraiti ilə təmin etməkdir».

C.Sumərinli hesab edir ki, burda korrupsiya ehtimalı var və bütün baş verənlər ciddi araşdırılmalıdır. «Müdafiə Nazirliyi bir neçə şəxsin məsuliyyətə cəlb olunması ilə bağlı məlumat yaydı. Düşünürəm ki, bu məsələ çox ciddi araşdırılmalıdır ki, niyə Azərbaycan əsgəri ac, tibbi təminatsız qalmalıdır? Əsgərlər nə vaxta qədər öz problemlərini sosial şəbəkələrdə qaldırıb onların həllinə çalışacaqlar? Əsgər ərzaq, yatmaq üçün isti yer axtarmalı deyil. Qalib və bu qədər hərbi büdcəsi olan, təminatı olan ordu üçün bu yolverilməzdir».

Ekspert düşünür ki, Müdafiə Nazirliyi qarşıdakı bir-iki həftə ərzində bütün bu problemləri həll edəcək.

C.Sumərinli deyir ki, gələcəkdə bu tip problemlərin baş verməməsi üçün arxa təminata görə məsul şəxslər öz vəzifə səlahiyyətlərinə məsuliyyətlə yanaşmalıdır. «Azərbaycan müdafiə sektorunda təminat-təchizat, tender məsələlərində həmişə problemlər olub. Bu sahələrdə şəffaflıq olmalıdır. Bundan əlavə cəmiyyət, media və qeyri-hökumət təşkilatları, parlament qarşısında hesabatlılıq təmin edilməlidir. Bu istiqamətdə hər hansı rüşvətxorluq, korrupsiya halları baş verərsə bu prosesdə iştirak edən şəxslər mütləq cəzalandırılmalıdır. Müdafiə Nazirliyinin rəhbərliyi buna diqqət yetirməlidir, əks halda həmişə bu problemlər ortaya çıxacaq».

Milli Məclisin Müdafiə, Təhlükəsizlik və Korrupsiya ilə mübarizə Komitəsinin üzvü Nurlan Həsənov Turana bildirib ki, Azərbaycan müharibədən təzə çıxmış bir ölkədir və hər hansı xırda nöqsanlar baş verə bilər. «Müəyyən əsgərlərdə ərzaq baxımından çətinlik yarana bilər, amma bu o demək deyil ki, bütün hərbçilərimiz orada maddi və yaxud ərzaq baxımından əziyyət çəkir. Xeyr, bu bütün əsgərlərə aid deyil, sadəcə olaraq müəyyən əsgərlərdə bu problem yaranıb. Dövlətimiz də çalışır ki, o çətinlikləri aradan qaldırılması üçün əlindən gələni etsin».

Politoloq Nəsimi Məmmədli AzadlıqRadiosuna bildirib ki, ordunun ərzaq təchizatında problemlər var idi və hərbi əməliyyatlar bitəndən sonra bu qabarıq şəkildə üzə çıxdı. «Burda həm obyektiv həm subyektiv səbəblər var. Məsələnin obyektiv tərəfi ondan ibarətdir ki, Azərbaycan əvvəlki təmas xəttindən xeyli qabağa irəliləyib və bunun nəticəsində ərzaq təminatı ilə obyektiv problemlər yaranıb. Orada yol infrastrukturun, kazarma şəraitinin olmaması təbii və obyektiv səbəblərdir. Subyektiv səbəb ondan ibarətdir ki, faktiki olaraq ordu təchizatı ilə bağlı məsələləri düzgün qurulmadığı dəfələrlə sübut olunub. Bu təkcə ərzaq və texniki təchizat məsələləri deyil».

Ekspert hesab edir ki, xırda kimlərisə cəzalandırması yox, bütövlükdə Müdafiə Nazirliyi sistemində bu məsələlərə yenidən baxılması və ciddi şəkildə dəyişdirilməsi vacibdir. "Bu neqativ halların ortadan qalxması ilə bağlı məsələlər öz əksini tapmalıdır».

N.Məmmədli qeyd edib ki, Müdafiə Nazirliyi elə bir qurumdur ki, orada dövlət satınalmaları, tenderlər kimlər vasitəsilə həyata keçirilir, ərzaq təchizatı kimin üzərində olduğu, hansı amillər rol oynadığı bildirilmir. «Digər nazirliklər kimi Müdafiə Nazirliyində də tenderlərin keçirilməsi ilə bağlı ciddi problemlər var. Dünyanın bir çox ölkələrində ordu təchizatı ilə bağlı internet vasitəsilə müəyyən tenderlər keçirilir. Amma bizdə bunlar o qədər məxfi və qapalı saxlanılır ki. Ərzaq təchizati niyə dövlət sirri olmalıdır? Mütləq şəffaflıq təmin edilməlidir, ictimai nəzarət olmalıdır».—0—