Azərbaycan-İran birgə komissiyası Azərbaycanın işğaldan azad edilmiş ərazilərində bərpa işlərilə məşğul olacaq

Tehran/24.12.20/Turan:  İran Prezident Administrasiyasının rəhbəri Mahmud Vaezi yanvarın ortalarında İranla Azərbaycan Respublikası arasında birgə iqtisadi komissiyanın yaradılacağını elan edib.

"Azərbaycan Respublikasının iqtisadi inkişaf naziri Şahin Mustafayev bir sıra yüksək vəzifəli şəxslərlə, o cümlədən energetika naziri və iqtisadiyyat nazirinin müavini ilə, eləcə də müxtəlif nazirliklərdən bir sıra müavinlərlə Tehrana gəlib və onlarla çox yaxşı görüşlər keçirilib", - İRNA agentliyi Vaezidən sitat gətirib.

Onun sözlərinə görə, "Azərbaycanla Ermənistan arasında münaqişədən sonra regionda yeni şərait yaranıb və bu şərtlərin idarə olunması müxtəlif məsələlər üzrə dialoq tələb edir".

"Əldə edilmiş razılaşmalara əsasən üç həftə sonra Tehranda birgə iqtisadi komissiyanın yaradılması qərara alınıb. Quruma iqtisadiyyat və maliyyə naziri başçılıq edəcək.  Müxtəlif idarələr isə bu sahələrdə əməkdaşlıq edəcəklər", - o bildirib.

Qeyd edək ki, İkinci Qarabağ Müharibəsi nəticəsində Azərbaycanın işğaldan azad olunmuş rayonlarının bərpası işlərinə xarici investorların dəvət edilməsi barədə rəsmi Bakının bəyanatından sonra İran hakimiyyəti böyük fəallıq göstərib. Belə ki, İranın çoxsaylı şirkətləri bir çox tikinti və infrastruktur layihələrində, ilk növbədə İranla həmsərhəd rayonlarda iştiraka hazır olduqlarını bəyan ediblər. -02D-