Ötən gün Aleksandr Lapşin təcridxanada intihara cəhd edib

Bakı/11.09.17/Turan: Azərbaycan prezidentin ictimai-siyasi məsələlər üzrə köməkçisi Əli Həsənov bloger Aleksandr Lapşinin əfv edilməsi barədə prezidentin sərəncamını şərh edib.

Onun sözlərinə görə, Lapşinin Azərbaycanda cəza çəkməkdən azad olunması və İsrail hökumətinə təhvil verilməsi məsələsi çoxdan idi ki, iki dövlətin müvafiq orqanları arasında müzakirə olunurdu.

"Razılığa gəlinmişdi ki, əfv sərəncamından sonra Azərbaycan hökuməti Lapşini İsrail tərəfinə təhvil verəcək və Lapşin bundan sonrakı öhdəliyini İsrail hökumətinin qanunlarına müvafiq olaraq yerinə yetirəcək. Lakin təəssüflər ki, İsrail rəsmiləri onun ekstradisiyası ilə bağlı proseduru bir xeyli uzatdılar. Bunun nəticəsi olaraq, dünən xoşagəlməz bir hadisə yaşanıb. Lapşin cəzaçəkmə müəssisəsində özünəqəsd cəhdinə əl atıb. Düzdür, həbsxana nəzarətçilərinin ayıqlığı və çevikliyi nəticəsində bu qəsdin qarşısı alınıb, təcili olaraq ona lazımi tibbi yardım göstərilib və hazırda Lapşin həkim nəzarəti altında müalicəsini davam etdirir", - Ə.Həsənov AzərTAC agentliyinə bildirib.

Onun sözlərinə görə, prezidentin əfv sərəncamı imzalamasından sonra hazırda Lapşinin ekstradisiya məsələsi ilə Azərbaycan Xarici İşlər Nazirliyi və İsrail səfirliyi məşğul olur. Yəqin ki, qısa vaxtda bu proses başa çatacaq. -06D--