Peterburq ziyalıları müharibədən dəhşətə gəliblər

Bakı/25.02.22/Turan: Fevralın 24-də, Ukrayna ilə müharibənin ilk günündə Rusiyada qonşu dövlətə qarşı təcavüzün dayandırılmasını tələb edən vətəndaşların kütləvi etiraz aksiyaları keçirilib. Rusiyadakı rəsmi mənbənin məlumatına görə, Moskvada təxminən 600 nəfər saxlanılıb. “Novaya qazeta”nın baş redaktoru, Nobel mükafatı laureatı Dmitri Muratov ukraynalılarla müharibəyə etirazla çıxış edib. O, öz videomüraciətində əmin olduğunu bildirib ki,  Rusiya xalqından başqa dünyada heç kim bu müharibəni dayandıra bilməyəcək.

Sankt-Peterburqdan iqtisadiyyat professoru Vladimir Rıjkov dünən başlayan müharibədən qəzəblənən Rusiya ictimaiyyətindəki əhval-ruhiyyə barədə Turan-ın sualına cavab verib.

O deyib ki, müharibə ilə əlaqədar Rusiya cəmiyyətinin əhval-ruhiyyəsinə dair statistik sorğular olmadığından o, öz ətrafı ilə bağlı mülahizə yürüdə bilər.

"Mənim ünsiyyət çevrəmdə demək olar ki, hər kəs bu müharibədən dəhşətə gəlib, amma bunlar, Sankt-Peterburq ziyalılarıdır. Mənim qohumlarım arasında bu müharibəni dəstəkləyənlər də var. Onlar yaşlı nəslin nümayəndələridir, Rusiya televiziyasına baxır və ona inanırlar.

Müharibə əleyhinə güclü hərəkatın yaranmasına inanmıram, amma Peterburq tələbələrinin əksəriyyəti (18-25 yaş) bu müharibəyə qarşı çıxır və etiraz mitinqlərinə çıxmağa hazırdır", - Rıjkov şəxsi müşahidələrini bölüşüb.

"Müxtəlif adamlar (Rusiyada - red.) fərqli düşünürlər. Rusiya televiziyasına baxanlar “Donbasın dinc əhalisinə qarşı soyqırım” həyata keçirən "ukraynalı faşistlərə" inanırlar. İnternetdən məlumat alanlar bütün bu cəfəngiyata inanmırlar və başa düşürlər ki, söhbət qardaş müharibəsindən gedir.

Tələbələrin əksəriyyəti yaxın vaxtlara qədər apolitik idi. Bu əksəriyyətə müharibənin necə təsir edəcəyini hələlik bilmirik. Çox güman ki, müharibə əleyhinə nümayişlərdə iştirak etməyə hazır olanlar daha çox olacaq, nəinki “Navalnıya görə”. Amma bu, hələ ki empirik yoxlamaya ehtiyacı olan nəzəri fərziyyədir”, - Rıjkov əlavə edib.

Fevralın 24-də hüquq müdafiəçisi Lev Ponomaryov Change.Org platformasında Ukrayna ilə müharibəyə son qoyulmasını tələb edən müraciət yerləşdirib. Bir gecədə müraciət demək olar ki, 100 min səs toplayıb və onun altında toplanan imzaların ümumi sayı 388 mini keçib. İlk səkkiz saat ərzində sənəd 290 mindən çox imza toplayıb.

Ponomaryov Rusiyadakı bütün sağlam düşüncəli adamları müharibəyə qarşı çıxmağa çağırıb. "Putin Rusiyada və onun hüdudlarından kənarda yüksələn müdrik səslərə, bu müharibənin Ukrayna və Rusiya üçün baha başa gələcəyinə baxmayaraq, Ukraynaya qarşı hərbi əməliyyata başlamağı əmr etdi. Rusiyanın rəsmi ritorikası iddia edir ki, bu, "özünümüdafiə"məqsədilə edilir. Amma tarixi aldatmaq olmaz", – hüquq müdafiəçisi müraciətdə yazıb, - bu gün "Kavkazskiy uzel” bildirib.—0—