Polislə qarşıdurma zamanı ölənlər və yaralananlar var

Nardarandan daxil olan məlumatlara görə, polislə qarşıdurma zamanı iki nəfər həlak olub və bir neçə nəfər yaralanıb. Rəsmi orqanlar şərh verməkdən imtina edir.

Xəsarət alanların daxil olduğu 3 nömrəli Sabunçu rayon xəstəxanasından Turan agentliyinə bildiriblər ki, həlak olanlar və yaralılar haqqında məlumat vermək onlara qadağan edilib.

İlkin məlumatlara görə, iki polis onlara atılan qumbaranın partlaması nəticəsində həlak olub, bir neçə nəfər isə yaralanıb.

Qarşıdurma zamanı polis və yerli sakinlər avtomatlardan və tapançalardan istifadə ediblər. -0-

* * *

Daxili Qoşunların əsgərlərini daşıyan bir neçə avtobus Bakının Sabunçu rayon polis idarəsinin binasını mühafizəyə götürüb. Şahidlərin sözlərinə görə, əsgərlər əllərində qalxanlarla binanın ətrafına düzülüblər və heç kimi yaxın buraxmırlar.

Onların buraya gəlməsinin səbəbi bu gün Nardaranda həbs edilmiş “Müsəlman birliyi” hərəkatının lideri Taleh Bağırzadənin və onun bir neçə tərəfdarının məhz Sabunçu polis idarəsinə gətirilməsidir.

Bundan sonra bir qrup Nardaran sakinləri binanın qarşısına gələrək, onların azad edilməsini tələb edib.

* * *

Polis bu gün məşhur ilahiyyatçı Taleh Bağırzadənin saxlanması üzrə əməliyyat həyata keçirib. Onun tərəfdarları və polis arasında qarşıdurma yaranıb, polisə qumbara atılıb, yaralananlar var. Bu barədə Turan-a hüquq-mühafizə orqanlarındakı məlumatlı mənbələr bildirib.

DİN-in mətbuat xidməti hələlik vəziyyətlə bağlı şərh vermir.

Islamazeri.az saytının məlumatına görə, əməliyyat zöhr namazının qılınması zamanı həyata keçirilib ki, bu da dindarların kəskin narazılığına səbəb olub.

Bağırzadən başqa, daha bir neçə nəfər saxlanılıb, onlar naməlum istiqamətə aparılıb.

Polis əməliyyat zamanı xüsusi vasitələrdən istifadə edib.

Qara maskalı xüsusi təyinatlılar qrupu dindarların namaz qıldığı “Hüseyniyyə” ibadətgahına daxil olub və tüstü şaşkaları atıb. Taleh Bağırzadənin və bəzi digər şəxslərin başına qara torbalar keçirilib və ibadətgahda çıxarılıb. Bu zaman orada olan bəzi insanlara qarşı hansısa preparatlardan istifadə olunub və insanlar huşunu itirib.

Bundan dərhal sonra Nardaran qəsəbəsində kütləvi iğtişaşlar başlayıb, insanlar kortəbii mitinqə toplaşır. Polis qüvvələri qəsəbəyə cəlb olunur. -0-