Prezident İlham Əliyev Olimpiya Oyunlarında ən yüksək nəticələrə görə mükafatlar müəyyən edib

 Prezident İlham Əliyev Milli Olimpiya Komitəsi prezidenti kimi Braziliyanın Rio-de-Janeyro şəhərində keçirilən XXXI Yay Olimpiya Oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında” sərəncam imzalayıb.

XXXI Yay Olimpiya Oyunlarında ən yüksək nəticələrə görə Azərbaycan Respublikasının idmançıları və onların məşqçiləri üçün mükafatların məbləği aşağıdakı qaydada müəyyən edilib:

- birinci yer tutan hər bir idmançıya 200 min manat, onun məşqçisinə 100 min manat;

- ikinci yeri tutan hər bir idmançıya 100 min manat, onun məşqçisinə 50 min manat;

- üçüncü yeri tutan hər bir idmançıya 50 min manat, onun məşqçisinə 25 min manat.

Rio-de-Janeyro oyunlarında azərbaycanlı idmançılar 18 medal, o cümlədən 1 qızıl, 7 gümüş və 10 bürünc medal qazanıblar.

Beləliklə, MOK idmançılara 1,4 mln. manat, məşqçilərə isə 700 min manat verəcək.

Bundan öncə dövlət başçısının 18 iyul tarixli sərəncamı ilə qızıl medal sahibinə 400 min manat, onun məşqçisinə 200 min manat həcmində mükafat müəyyən etmişdi. 

Gümüş mükafat idmançı üçün 200 min manat, məşqçi üçün 100 min manat; bürünc mükafata görə idmançı üçün 100 min, məşqçi üçün 50 min manat müəyyən edilmişdi.

18 idmançı və məşqçi  üçün müəyyən edilən mükafatın həcmi 4,2 mln. manat (idmançılar 2,8 mln. manat, məşqçilər 1,4 mln. manat) təşkil edirdi.

18 azərbaycanlı mükafatçıdan 11-i legionerdir.—03B06--