Prezidentin oğlunun toyu olub

Bakı/26.11.22/Turan:  Birinci vitse-prezidenti Mehriban Əliyeva öz rəsmi İnstagram səhifəsində oğlu Heydər Əliyevin toyu münasibətilə yazı paylaşıb.

“Dünən ailə üzvləri və doğmalarımızla oğlumuz Heydərin toyunu qeyd etdik. Xoşbəxtəm ki, artıq bizim üç qızımız var. Bütün valideynlər kimi biz də oğlumuza ailə səadəti arzulayırıq. Uca Allah gənc ailəyə yar olsun, bir-birinə olan sevgi və hörməti bir ömür boyu qorumağa kömək etsin! Xoşbəxt olun!”, - birinci xanım yazıb.

Toyun harada keçirildiyi və Heydərin xanımının kim olduğu açıqlanmır. Gənclərin yayımlanan fotosu arxadan, sərv ağacının və dənizin  fonunda çəkilib. Görünür, cütlük dövlət başçısının “Zaqulba” iqamətgahında foto çəkdirib.

Toy Azərbaycan üçün ənənəvi olan dəbdəbəli atmosferdə keçməyib. Bu, təəccüblü deyil. Son illər Əliyevlər daha çox asketik və daha az ictimai həyat tərzi keçirirlər.

Heydər 1997-ci il avqustun 3-də anadan olub. Heydər Əliyev adına Müasir Təhsil Kompleksini bitirib. 2017-ci ildə Azərbaycan Diplomatik Akademiyasının bakalavr pilləsini bitirib. 2018-2019-cu illərdə orduda xidmət edib.