Prokuror ABB-nin keçmiş rəhbərinin 17 il azadlıqdan məhrum edilməsini istəyir

Çərşənbə axşamı Azərbaycan Beynəlxalq Bankının (ABB) keçmiş rəhbəri Cahangir Hacıyevin işi üzrə məhkəmədə prokuror Fərid Nağıyev çıxış edib. O, C.Hacıyevin 17 il azadlıqdan məhrum edilməsini istəyib.

Həmçinin prokuror  iş üzrə keçən digər yeddi müttəhimin uzun müddətə mühakimə edilməsini istəyib: İlqar Abdullayev 8 il, Yusif Ələkbərov 11 il, İbrahim Hüseynov 11 il, Anar Sultanov 8 il, Məhəmməd Cahangirov 8 il, Kənan Orucov 7,5 il, Azad Cavadov  12 il,  11 ay.

Prokuror bildirib ki, ABB sədrinin həyat yoldaşı,  hazırda xaricdə gizlənən Zəminə Hacıyeva da dələduzluq və mənimsəmə ilə məşğu olub.

Dövlət ittihamçısı C.Hacıyevin  mənzilindən götürülən qiymətli əşyaların  ABB-nin xeyrinə müsadirə olunmasını istəyib.

Vəkil Fəxrəddin Mehdiyev prokurorun çıxışını Turan-a şərh edərkən deyib ki, prokurorun ittihamı əsassızdır. Buna cinayət işi kimi yox, mülki iş kimi baxılmalıdır. “Müttəhim öz günahını inkar edir və biz öz çıxışımızda bu barədə söyləyəcəyik”, - o bildirib və əlavə edib ki, proses oktyabrın 3-də davam edəcək.

Cahangir Hacıyev və adları sadalanan 7 nəfər Cinayət Məcəlləsinin 179.3.1, 179.3.2 (mütəşəkkil dəstə tərəfindən külli miqdarda mənimsəmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 309.2 (vəzifə səlahiyyətlərini aşma ağır nəticələrə səbəb olduqda), 313-cü (vəzifə saxtakarlığı), 228.1 və 228.4-c-ü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə ittiham olunur.16D