Prokurorluq qətldə ailə başçısından şübhələnir

Bakı/24.07.17/Turan: Baş Prokurorluq və Daxili İşlər Nazirliyi (DİN) Bərdə rayonunda baş vermiş dəhşətli qətl və intihar hadisəsi ilə bağlı birgə məlumat yayıb.

Məlumatda deyilir ki, iyulun 24-də gecə saat 03 radələrində Bərdə rayonunun Hacallı kəndində yaşayan Gülbəniz Əliyeva, övladları Məleykə Əliyeva və oğlu Murad Əliyev ağır bədən xəsarətlərilə Rayon Məkəzi Xəstəxanasına aparılıb. G.Əliyeva xəstəxanada vəfat edib.

G.Əliyevanın həyat yoldaşı Saday Əliyev isə yaşadığı evin həytəində özünü asıb.

Rayon prokurorluğu və polis şöbəsinin əməkdaşları, məhkəmə-tibbi ekspert meyitlərə baxış keçirib, maddi sübutlar götürülüb və digər zəruri prosessual hərəkətlər aparılıb.

Faktla bağlı rayon prokurorluğunda Cinayət Məcəlləsinin 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 29, 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürməyə cəhd), 29,120.2.7 (iki və ya daha çox şəxsi qəsdən öldürməyə cəhd) və 125-ci (özünü öldürmə həddinə çatdırma) maddələri ilə cinayət işi başlanıb, iş üzrə müvafiq ekspertizalar təyin edilib.

Məlumata görə, ilkin araşdırmalarla S.Əliyevin psixi xəstəlikdən əziyyət çəkməsi, arvadı və övladlarına bədən xəsarətləri yetirməsi və sonradan intihar etməsi müəyyən edilib.-05d-