Qar yağması səbəbindən ölkənin bir sıra yollarında avtomobillərin hərəkəti dayandırılıb

Bakı/12.03.21/Turan:  Qar yağması səbəbindən Bakı-Şamaxı yolunda (39-45 kilometr) avtomobilin hərəkəti dayandırılıb. Bu barədə martın 12-də günün ikinci yarısında Azərbaycan Avtomobil Yolları Agentliyi məlumat yayıb.

Həmçinin Şamaxı rayonundan Ağsuya (Ağsu aşırımı) qədər hissədə də hərəkət dayandırılıb.

Qeyd olunan sahələrdə xüsusi texnikanın köməyilə yolun təmizlənməsi işləri aparılır, lakin güclü çovğun yenidən yolu qarla örtür.

Bakı-Quba-Rusiya dövlət sərhəddi yolunda da qar səbəbindən hərəkət dayandırılıb.  Xınalıq və Giləzi dağ yollarında da vəziyyət eynidir.

Güclü külək Bakı-Qobustan yolunda hərəkəti çətinləşdirir. 90-109 kilometrlik sahədə güclü buzlaqlar əmələ gəlib. Bakı-Ələt-Ucar-Yevlax marşrutu az-çox normal işləyir.

Yevlax-Gəncə-Qazax–Gürcüstan sərhəddi yolunda Qazax ərazisində hərəkət çətinləşib.

Şəkidən Gürcüstanla sərhəddə qədər gedən yol və İsmayıllı-Qəbələ-Oğuz-Şəki yolunda  hərəkət bərpa edilib.

Gəncədən Daşkəsənə və Şəmkirdən Gədəbəyə qədər hərəkət etmək çətinləşib, qar yağır.

Ələt-Astara yolunda qar yağmasına baxmayaraq, hərəkət dayandırılmayıb -03D-