Qarabağ ətrafında müzakirələr

Bakı/27.09.20/Turan:  “Qarabağ Tribunası”nın təşəbbüsü, “Bakı Dirçəliş” ittifaqının təşkilatçılığı və bir qrup tanınmış ekspertlərin iştirakı ilə Bakının Türkan kəndində Qarabağ məsələsi ətrafında yaranmış hazırkı durum Sentyabrın 26-da müzakirə edilib.

Qarabağ ətrafında gedən son proseslərin mahiyyəti, maraqlı xarici qüvvələrin yanaşmaları, ölkəmizin təhlükəsizliyinə yarana biləcək sonuclar, eyni zamanda problemin həllində cəmiyyətin fəal iştirakının yolları, ölkə ictimaiyyətinin bu istiqamətdə atmalı olduğu addımlar barəsində geniş fikir mübadiləsi aparılıb.

Problemlə bağlı mümkün siyasi-hərbi variantlar, hərbi hazırlıqlar istiqamətində resursların vəziyyəti, təmas xətti boyunca əhalinin sosial-psixoloji vəziyyəti, regional və beynəlxalq münasibətlərin problemin həllinə təsirləri, habelə, diplomatiyamızın son durumu və imkanları dərindən təhlil edilib. 

Ölkənin ciddi müxalif siyasi qurumlarının, müstəqil vətəndaş cəmiyyətinin, ictimai xadimlərin üzərinə düşən mənəvi-ictimai missiyanın aydın müəyyən edilməsi və həyata keçirilməsi imkanları ətraflı müzakirə olunub.

Problemin həllinə yönəlik sistemli ictimai fəaliyyətin və konsepsiyanın hazırlanması, reallığı əks etdirən tezislərin müəyyən edilməsi və müxtəlif metodologiya ilə cəmiyyətə çatdırılması, eləcə də dövlət-vətəndaş münasibətlərində gərginliyə və etimadsızlığa səbəb olan amillərin ortadan qaldırılması üçün təkliflərin hazırlanması məqsədə uyğun sayılıb.

“Qarabağ Tribunası” əməkdaşlıq etdiyi qurumlarla və peşəkar ekspertlərlə birgə bu istiqamətdə müzakirələri davam etdirmək, sistemli ictimai, siyasi və təşkilati strategiya həyata keçirmək barəsində müvafiq qərarlar qəbul edib.

Müzakirədə Turan İnformasiya Agentliyinin rəhbəri Mehman Əliyev, sabiq xarici işlər naziri Tofiq Zülfüqarov, hüquqşünas Ələsgər Məmmədli, təhlükəsizlik məsələləri üzrə ekspert İlham İsmayıl, “Bakı Dirçəliş” təşkilatının sədri Abbasağa Məmmədov, politoloq Xəqani Cəfərli, politoloq Nəsimi Məmmədli və  “Bakı Dirçəliş” təşkilatının İdarə Heyətinin üzvləri iştirak edib. –0—