Qarpız satıcısı ilə polisin mübahisəsi faciə ilə nəticələnə bilərdi

Bakı/27.07.22/Turan: İyulun 26-da Tik-Tok sosial şəbəkəsində yayılan videoda Bakı-Sumqayıt yolunda qarpız satıcısı polislə mübahisə edir və intihar edəcəyilə hədələyir. Məlum olub ki, bu, Saatlı rayon sakini Yaşar Cahangirovdur. O bildirib ki,  polis ona ticarətlə məşğul olmağa imkan vermir.

Tibbi Ərazi Bölmələrini İdarəetmə Birliyindən Turan-a bildiriblər ki,   Cahangirov  yanıqlarla reanimasiya şöbəsinə yerləşdirilib.

Öz növbəsində, Daxili İşlər Nazirliyi Yol Polisi İdarəsindən Turan agentliyinin sorğusuna aşağıdakıları bildiriblər:

“26.07.2022-ci il tarixində Bakı-Quba yolunun 25-ci km-də dövlət qeydiyyat nişanları olmadan, yol nişanlarının digər sürücülər tərəfindən aydın görünməsinə, eləcə də piyadaların hərəkətinə maneə yaradacaq formada, avtomobil yoluna bitişik təhkim zolağında saxlanılmış “Qazel” markalı nəqliyyat vasitəsində ticarətlə məşğul olan və bununla da yol hərəkəti təhlükəsizliyi qaydalarını pozaraq həm özü, həm də digər yol hərəkəti iştirakçıları üçün qəza təhlükəsi yaradan Saatlı rayon sakini Yaşar Cahangirovun barəsində Dövlət Yol Polisi  əməkdaşları tərəfindən Azərbaycan Respublikası İnzibati Xətalar Məcəlləsinin 354.0.8-ci maddəsi ilə protokol tərtib olunub, bu zaman vətəndaş Yaşar Cahangirov polisləri çəkindirmək məqsədilə əynində olan köynəyi yandıraraq yerə atıb, bununla da qanunsuz hərəkətlərini davam etdirməyə çalışıb.

Lakin nəqliyyat vasitəsi yolun təhkim zolağından kənarlaşdırılaraq, yol hərəkətinin təhlükəsizliyi təmin edilib. Baş Dövlət Yol Polisi İdarəsi bir daha bütün yol hərəkəti iştirakçılarından yol hərəkəti qaydalarına riayət etməyi, özləri və digər hərəkət iştirakçıları üçün qəza təhlükəsi yaratmamağı xahiş edir, eyni zamanda belə hallara yol verən yol hərəkəti iştirakçıları barəsində ciddi tənbeh tədbirlərinin görüləcəyini nəzərə çatdırır”.02D