Qeyri-ənənəvi orientasiyanın nümayəndələri təqibdən şikayət edir

Qeyri-ənənəvi orientasiyanın nümayəndələrini birləşdirən “Nəfəs” alyansı üzvlərinin qarşılaşdığı ayrı-seçkiliklə bağlı DİN-ə müraciət edib.

Müraciətdə deyilir ki, son 10 gündə iki nifrət cinayəti baş verib. Onlardan biri - 19 yaşlı gənc uzun müddət ailəsinin və ətrafındakı insanların diskriminasiyasına dözməyərək özünü öldürüb. İkinci hadisə qardaşının dostu tərəfindən aldadılaraq görüşə çağırılan 17 yaşlı gəncin 8 nəfərin zorakılığına məruz qalması ilə bağlıdır. Həmin şəxslər hadisəni video lentə çəkərək pul istəməklə onu şantaj ediblər. İstənilən məbləği verə bilmədiyi üçün valideynlərinə onun gay olduğunu bildiriblər.

Valideynləri tərəfindən döyülən həmin gəncdən indiyə qədər heç bir xəbər yoxdur.

2013-cü ilin dekabrında Alyans rəhbəri Cavid (Atilla) Nəbiyev dəfələrlə Sumqayıt şəhər polis idarəsinə müraciət edərək, təhlükəsizliyinin təmin edilməsi və təhdid edənlər barədə araşdırma aparılmasını xahiş etsə də, bunun müsbət nəticəsi olmayıb.

Alyans hesab edir ki, insanların cinsi ayrı-seçkiliyə məruz qalması və şəxsi həyatına görə təqib edilməsi, hədə-qorxu gəlinməsi yolverilməzdir. 

“Bu səbəbdən, Sizə müraciət edirik ki, yaranmış vəziyyətin araşdırılması, xuliqanlıqla məşğul olan qrupların müəyyənləşdirilməsi və qanunvericilikdə nəzərdə tutulmuş qaydada cinayət məsuliyyətinə cəlb edilməsi, hüquq-mühafizə orqanlarının qanunda nəzərdə tutulmuş formada bizimlə əməkdaşlıq etmələri üçün göstəriş verəsiniz”, deyə müraciətdə qeyd edilir. -16D-