![Qəzalı evin sakinləri məcburi köçürülə bilər](https://turan.az/resized/media/2019/main/080600020739-750-500-resize.webp)
Bakı/06.08.19/Turan: Yasamal rayonu, Mirzə Ağa Əliyev küçəsi, 150 ünvanında yerləşən 3 mərtəbəli evin sakinləri evi tərk etməkdən imtina edirlər.
43 mənzilin sakinləri onlara verilən kompensasiyalar az olduğuna görə evlərini tərk etmək istəmirlər. Bu barədə sakinlər "Azadlıq Radiosu"na bildiriblər.
Sakinlərin sözlərinə görə, mənzillərin sahəsi balacadır, bir kvadrat metrinə görə isə kiçik məbləğ verilir. "Biz çıxmağa razıyıq. Özümüz də burada yaşamağa qorxuruq. Cəmi 30 min pul verirlər. Bu pula nə ala bilərəm? Keçən həftə icra başçısı Eldar Əzizov gəlmişdi. Bizə dedi ki, niyə narazılıq edirsiniz, 30 minə 30 ev alaram. Belə şey olar?"
Bakı Şəhər İcra Hakimiyyətinin mətbuat xidmətindən isə Turan-a bildiriblər ki, sözügedən bina hər an uça bilər, lakin bəzi sakinlər binanı tərk etməkdən imtina edirlər.
İH-dən verilən məlumata görə, 1889-cu ildə tikilmiş binanın istismar müddəti bitib və hələ 1989-cu ildə Bakı Şəhər XDS İcraiyyə Komitəsinin qərarı ilə qəzalı hesab edilərək sökülməli idi. "Həmin il sakinlərin oradan köçürülməsinə başlanılaraq binadan 23 ailə köçürülüb, sonradan isə burada məcburi köçkünlər məskunlaşıb. Buna görə binanın sökülməsi işləri təxirə salınıb. Keçən 30 il ərzində binada vəziyyət daha da ağırlaşıb, bina yaşayış üçün tam yararsız vəziyyətə düşüb. Bu da sakinlərin həyatı və onların əmlakı üçün ciddi təhlükə yaradır".
İcra hakimiyyətinin nümayəndəsi İsrafil Kərimov bildirib ki, dövlət tərəfindən ayrılmış vəsaitə uyğun bu binada sakinlərin köçürülməsi işlərinə başlanıb: "43 ailədən 25-i dövlət tərəfindən ayrılan maddi yardımları alaraq binadan köçüb. Sakinlərin bir hissəsi isə dövlət qurumları qarşısında qeyri-real tələblər irəli sürərək, mənzillərini tərk etməkdən imtina edib, bundan başqa, digərlərini də qanunsuzluqlara təhrik edərək bəzi KİV-də hüquqlarının pozulması ilə bağlı kampaniya təşkil etməyə cəhdlər də ediblər".
O qeyd edib ki, ailələrdən 6-sı məcburi köçkün ailələridir. Digər məcburi köçkünlərlə bərabər, bu ailələrə də Qobupark yaşayış kompleksində yeni təmirli mənzillər təklif edilib. "Hətta bu ailələrin bəzilərinə ailə tərkibinə uyğun olaraq 2 mənzil təklif olunub. Lakin bu vətəndaşlar onlara təklif edilən mənzillərdən əlavə zəbt etbikləri mənzillərdən çıxmaq üçün maddi kompensasiya da tələb edirlər. Daha 7 ailə isə sahəsi 12-15 kvadratmetr olan kiçik otaqlarda çox çətin şəraitdə yaşamaqda davam edirlər. Onlara müvafiq qanunvericiliyə uyğun olaraq maksimum həddə maddi yardım təklif edilib. Lakin, buna baxmayaraq, həmin sakinlər qəzalı binadan köçmək istəmirlər".
Mətbuat xidmətinin rəhbəri Eldar Əzizovun sakinlərlə görüşünə də toxunub. Onun sözlərinə görə, Əzizov binanın kəskin qəzalı olması ilə əlaqədar sakinlərin buradan təcili köçürülməsinin vacibliyini vurğulayıb. "Həmçinin bu zaman bildirilib ki, buradakı köçürülmə dövlət əhəmyyətli tədbirlərlə bağlı köçürülmə deyil, binanın istismara yararsız qəzalı vəziyyətdə olması ilə bağlıdır və vətəndaşlara ödəniləcək vəsait kompensasiya yox, maddi yardım kimi qiymətləndirilməlidir. Sözügedən binada sakinlərin köçürülməsi ilə bağlı ödəniləcək məbləğ müvafiq qanunvericiliyə uyğun olaraq şəhər üzrə maksimum həddə müəyyən edilib. Sakinlərin böyük əksəriyyəti vəziyyəti dərk edərək özlərinin və yaxınlarının həyatı ilə risk etməkdən imtina edib və maddi yardımlarını alıb binanı tərk ediblər. Sakinlərlə aparılan söhbətlərdən sonra daha 4 ailə qəzalı binanı tərk edib".
Mətbuat xidmətinin rəhbəri qeyd edib ki, əgər insanlar özləri və yaxınlarının həyatının təhlükədə olduğunu başa düşmək istəmir, buna bilərəkdən yol verirlərsə, bu zaman qanuna müvafiq qaydada məcburi şəkildə köçürülmə tədbirlərinin görülməsi tətbiq edilə bilər. -0-
Rəy yaz