QHT iddia edir, Müdafiə Nazirliyi təkzib edir

Almaniyada yerləşən "Xəzər" Hərbi Araşdırmalar İnstitutu (Caspian Defense Studies İnstitute) 2016-cı il yanvarın 1-dən Azərbaycanda hərbi qulluqçuların əmək haqqının 30-50% azaldığını bildirib. Öz növbəsində, Müdafiə Nazirliyi bu məlumatı təkzib edib.

Məlumatlı hərbi ekspertlər bildiriblər ki, əmək haqları əvvəlki ölçüdə qalıb, amma bəzi kateqoriyalara əlavə ödəmələr azalıb. Həmçinin, ştatların ixtisar edildiyi bildirilir.

"Xəzər" Hərbi Araşdırmalar İnstitutunun iddiasına görə, əmək haqlarının azaldılması 3 mindən çox zabit və giziri əhatə edir. İnstitutun mənbələri həmçinin iddia edirlər ki, Müdafiə Nazirliyi aparatının və Baş Qərargahın onlarla əməkdaşının vəzifəsi azaldılacaq və hərbi hissələrə göndəriləcək.

Bundan başqa, dekabrda və yanvarda Müdafiə Nazirliyinin bəzi birləşmələri ləğv və ixtisar edilib. Orduda ciddi struktur dəyişiklikləri davam edir.

Həmçinin bir çox hərbi hissələrin tikintisinin və yenidənqurmasının və zabit və gəzirlər üçün mənzillərin tikintisinin təxirə salınması qərara alınıb. Hərbi təlimlərin sayı, silah alışı da azaldılacaq, deyə "Xəzər" iddia edir.

Lakin Müdafiə Nazirliyinin mətbuat xidməti bunu təkzib edir, 2016-cı ildə müdafiə sahəsinə xərclərin artırılacağını bildirir.

Hərbi qulluqçuların maaşları azaldılmayıb, hərbiçilərin say tərkibində də dəyişiklik yoxdur. Əksinə, Mərkəzi Aparatda və SQ qərargahında struktur dəyişiklikləri nəticəsində tam optimallaşmaya nail olunub, ön cəbhədə yerləşən döyüş təyinatlı hərbi hissələrdə ixtisaslaşmış vəzifələrin sayı artırılıb. Bunun sayəsində faiz hesablaması ilə hərbi qulluqçuların əmək haqları artırılıb, şəxsi heyətin və onların ailə üzvlərinin sosial təminatı bazası gücləndirilib. Bu tədbirlər 2016-cı ildə də davam etdiriləcək.

Belə ki, 2016-cı ildə 10 yeni hərbi şəhərciyin, habelə xidməti və daimi mənzillərin təhvil verilməsi nəzərdə tutulur. Üç hərbi şəhərcik Novruz bayramına qədər təhvil veriləcək.

Həmçinin, müxtəlif qoşun növlərinin iştirakı ilə, o cümlədən beynəlxalq əməkdaşlıq çərçivəsində ikitərəfli və çoxtərəfli səviyyədə bir sıra təlimlər planlaşdırılır.

Hərbi ekspert Üzeyir Cəfərov Turan-a bildirib ki, əmək haqlarının azaldılması haqqında söhbətlər hərbiçilərin 13-cü maaşının ödənilməsində gecikmələrdən sonra yayılıb.

Əmək haqqı özü azaldılmayıb, sadəcə ön cəbhədə, həmçinin cəbhəyanı bölgəyə bitişik ehtiyat hissələrdə xidmət çəkənlər əvvəllər ikiqat vəzifə maaşı alırdılar.

İndi cəbhəyanı ehtiyat hissələrin hərbi qulluqçuları bir yarım əməl haqqı alacaqlar, ön cəbhədə isə ikiqat əmək haqları saxlanacaq. Bu, hərbi qulluqçuların cəbhə xəttində xidmət göstərməsinə təkan verəcək, ekspert belə hesab edir.

Bununla belə, pensiya yaşına gəlmiş hərbi qulluqçuların vəzifədən azad edilməsi, habelə əlavə ştatların ləğvi nəzərdə tutulur. -06D-