Qiyas İbrahimov dördüncü sutkada quru aclığı dayandırıb

Bakı/26.06.23/Turan:  İnzibati həbs olunanların saxlanma məntəqəsində saxlanılan fəal Qiyas İbrahimov səhhətinin kəskin pisləşməsi səbəbindən quru aclığın dördüncü günündə  aksiyanı dayandırıb. Bu barədə Turan-a onun anası Şura Əmiraslanova iyunun 26-da təcridxanada oğlu ilə görüşdən sonra bildirib. Onun sözlərinə görə, hazırda İbrahimov su və qida qəbul edir.

*Qiyas İbrahimov iyunun 22-də günorta saxlanılıb. Mülki geyimli şəxslər onun evinə gələrək iyunun 20-də Söyüdlü kəndində etiraz aksiyasının amansızcasına dağıdılması ilə əlaqədar polis və hakimiyyətin ünvanına yazdığı tənqidi statusu sosial şəbəkələrdən silməyi tələb ediblər.

Həmin gün məhkəmə ona İnzibati Xətalar Məcəlləsinin bir maddəsi - 535.1-ci maddəsilə (polisə tabe olmamaq) 1 ay müddətinə həbs cəzası təyin edib. Məhkəmə iclasından sonra İbrahimov aclıq elan edib.

İyunun 24-də isə məhkəmə onu İnzibati Xətalar Məcəlləsinin 388-1.1 (yayılması qadağan edilmiş məlumatların yerləşdirilməsi haqqında qanunvericiliyin tələblərinin pozulması) üzrə təqsirli bilib və həbs müddətini daha iki gün artırıb.

İyunun 25-də İbrahimov quru aclığın nəticəsində məhkəmə zalında huşunu itirib. Buna baxmayaraq, tibbi yardım göstərildikdən sonra Apellyasiya Məhkəməsi onun şikayətləri üzrə araşdırma aparıb və fəalı həbsdə saxlayıb.

** Qiyas İbrahimov əvvəllər də həbs olunub. Belə ki, 2016-cı ildə mərhum Bayram Məmmədovla birlikdə Heydər Əliyevin abidəsinin üzərinə siyasi şüarlar yazdıqdan sonra həbs edilib. Hər iki gənc 10 il həbs cəzasına məhkum olunub, lakin 2019-cu ildə əfv edilib. 21B06