Qobu sakinləri: Hələlik qaz var

Bakı/27.11.17/Turan: "Şənbə günü qəsəbədə sakinlərin aksiyasından sonra yaşayış məntəqəsinə qaz verilməsinə başlanılıb, hələ ki, qaz gəlir". Bunu Qobu qəsəbə sakinləri bildiriblər.

Sakinlərin sözlərinə görə, indi qazın təzyiqi yetərli dərəcədədir, yəni, yemək bişirmək olur, evləri isitmək mümkündür:

"Deməli, bunu etmək olar, niyə bu qazı əhaliyə vermək üçün hökmən sakinləri aksiya keçirməyə vadar edirlər. Bizim məqsədimiz aksiya keçirmək yox, evlərimizin qazla təmin olunmasıdır".

Amma bəzi sakinlər hələ də qazın davamlı veriləcəyinə şübhə edirlər: "Dəfərlərlə olub ki, müəyyən müddət qaz veriblər, sonra düşünüblər ki, əhali sakitləşdi, qazı yenə də kəsiblər, odur ki, qazın davamlı veriləcəyinə hələ də inana bilmirik".

Sakinlərin sözlərinə görə, bu gün, yəni, noyabrın 27-də qəsəbənin bir qrup yaşlı sakini qazla bağlı yaranan problemin səbəblərini öyrənmək üçün Abşeron Rayon Qaz İdarəsinə gedəcək.

Xatırladaq ki, Qobu qəsəbə sakinləri qaz verilməməsinə etiraz olaraq noyabrın 25-də yaşayış məntəqəsində aksiya keçiriblər. Sakinlərin sözlərinə görə, artıq bir aya yaxındır ki, qəsəbəyə qaz verilməyib, belə ki, verilən qaz təzyiq olmadığı üçün sakinlərin adi məişət problemlərinin belə həll etməyə yetərli olmayıb. --0--